Presidenti bjellorus Aleksandar Lukashenko sot akuzoi forca anonime në Rusi dhe Poloni për përzierje në zgjedhjet e ardhshme parlamentare në vendin e tij, në të cilat ai do të kandidohet për mandatin e tij të gjashtë.
Në takim me diplomatët Lukashenko deklaroi se ”zotërinjtë e kukullave” në të dy shtetet qëndrojnë pas kundërshtarëve të tij, të cilët kanë për qëllim të kandidohen në zgjedhje, të caktuara për më 9 gusht.
Lukashenko shtoi se tregime të rrejshme për të dhe familjen e tij përhapen nëpër Bjellorusi, në suaza të fushatës parazgjedhore të involvimit të huaj.
Kremlini sot i hodhi poshtë akuzat e Lukashenkos. Zëdhënësi i Kremlinit, Dmitrij Peskov, tha se Rusia “asnjëherë nuk është përzier, nuk përzihet dhe nuk planifikon të përzihet”, në zgjedhje në vendet tjera dhe shtoi se Minsku duhet të nxjerrë “argumente” për pohimet.
Siç afrohen zgjedhjet, autoritetet bjelloruse i intensifikojnë aktivitetet kundër opozitës, duke arrestuar rreth 360 aktivistë opozitar gjatë protestave masive në mbarë vendin./MIA