Pas zhvillimeve të fundit në Këshillin Gjyqësor, qeveria dhe opozita këto ditë do të diskutojnë për shpërbërjen e plotë të këtij organi. Këtë e deklaroi Ministri i Drejtësisë Krenar Lloga, i cili shprehu shqetësim për gjendjen në sistemin gjyqësor, ndërsa tha se si zgjidhje të mundshme e sheh që përbërja aktuale e Këshillit Gjyqësor të ketë ndërprerje të mandatit me dispozita ligjore kalimtare. Më shumë informacion rreth kësaj ai paralajmëroi ditëve në vijim, siç tha pasi të bisedojë me opozitën në Kuvend, ndërkaq nëse do të ketë ndryshime të tilla ligjore, do të jetë me konsensus me të gjitha partitë politike.
“Ajo që ka ndodhur në Këshillin Gjyqësor të gjithëve na shqetëson, e gjykoj atë dhe shpresoj që të kthehemi në normalitet, jo vetëm në atë institucion, por edhe në tjerat. Jam në diskutim me parti politike dhe krerë të qeverisë që të gjejmë zgjidhje, e një nga zgjidhjet mund të jetë me dispozita kalimtare ligjore që të ketë ndërprerje të mandatit të përbërjes aktuale të Këshillit Gjyqësor”, tha Krenar Lloga, ministër i Drejtësisë.
I pyetur nëse i ka marrë të gjitha procesverbalet nga seancat e Këshillit Gjyqësor, Lloga tha se ende nuk e kanë marrë procesverbalin që kërkonin dhe se nuk kanë marrë as shpjegim për këtë.
“Për fat të keq procesverbalin që ne po e kërkojmë edhe nëpërmjet mediave, edhe sot e kësaj dite nuk është dorëzuar në ministri. -A ka ndonjë shpjegim? -Jo, ende jo”, shtoi Krenar Lloga, ministër i Drejtësisë.
Përndryshe sondazhi i fundit i OSBE-së dhe Komisionit Kundër Korrupsionit, i bërë mes gjyqtarëve dhe prokurorëve tregon që nuk u besojnë autoriteteve më të larta të gjyqësorit, Këshillit Gjyqësor dhe Këshillit të Prokurorëve. Mbi 70% e të anketuarve thonë se Këshilli Gjyqësor punon për qëllime personale dhe partiake dhe nuk është mbrojtës i pavarësisë së gjyqësorit, që është funksioni i tij themelor. Gjithashtu, në anketën e bërë në mënyrë anonime, 32% e gjyqtarëve të anketuar janë ndjerë apo janë nën presion nga anëtarët e Këshillit Gjyqësor.