Larje hesapesh mes 3 të rinjve ishte arsyeja e përleshjes fizike që ndodhi mbrëmë afër poliklinikës në Bit Pazar, më saktësisht në parkingun mbrapa xhamisë “Isa Beg”. Banorët që jetojnë përreth tregojnë për TV21 se ngjarja s’kishte të bënte me prishje të radhës për të blerë bukë.
-Përnjëherë kanë dal nga kjo rruga dhe filluan të zihen dhe të gjuajnë. D.t.th s’kanë qenë duke pritur për bukë? Jo, jo, të ishin për bukë do të merreshin vesh me fjalë. S’vjen njeriu me allti për të blerë bukë.
-A njihen ata mes vete?
-Po, po njihen.
-Kjo dje që ka ndodhur nuk ka të bëjë fare me furrën e bukës, që thoshin se janë plagosur, janë vrarë për bukë. Rasti ka ndodhur dje këtu. Disa të rinj janë përleshur, arsyen nuk e dimë, por për bukë nuk ka lidhje.
-Jo, jo aspak, s’ka të bëjë me furrën asgjë. Ne blejmë këtu rregullisht nuk ka pasur asnjëherë problem. Kjo është tjetër punë, çfarë kanë rinia mes vete nuk është mirë.
Pronari i furrës afër së cilës ndodhi zënka thotë se i vjen keq për ngjarjen, megjithatë edhe ky thekson se për aq kohë sa ai punon në këtë furrë zënka për punë radhe nuk ka pasur asnjëherë.
“Nuk ka lidhje me ne ajo çfarë ka ndodhur dje. Nuk e di kush e nxori këtë. Për ditë pritet rend këtu, por deri sot nuk kemi pas asnjëherë problem. Ne ka 30 vite që punojmë në këtë dyqan por se çka është puna nuk e di. Këtu nuk ka ndodhur asgjë, atje lart tek parkingu ka ndodhur kjo punë.”- thotë pronari i furrës.
TV21 pyeti edhe MPB-në nëse dihet arsyeja e zënkës, megjithatë nga atje na e ridërguan njoftimin e djeshëm mbi rastin.
“Më datë 07.04.2023 rreth orës 18:00 në SPB-Shkup është raportuar se në afërsi të poliklinikës “Bit Pazar” ka ndodhur një konfrontim fizik dhe menjëherë pas kësaj nga Qendra Mjekësore “Shën Naumi i Ohrit” është raportuar se A.B. (20) është dërguar për ndihmë mjekësore me lëndime në dorën e djathtë nga arma, si dhe A.B. (23) me lëndime nga sende të forta dhe një i mitur 17 vjeç me lëndime sulmi fizik. Po punohet në zbardhjen e rastit.”- thanë nga MPB.
Megjithëse bëhet fjalë për zënkë të ashpër mes dy grupe të rinjsh, ku u përdoren edhe armë zjarri dhe të ftohta, askush nga banorët nuk i dinte arsyet e përleshjes.