Kosovë, ndalohen 52 persona që nuk respektuan kufizimin e lëvizjes

TË FUNDIT

Policia e Kosovës ka ndalur 52 persona të cilët nuk kanë respektuar vendimin e qeverisë rreth kufizimit të lëvizjes. Rastet më të shumta gjatë 24 orëve të fundit, janë shënuar në Prizren, komunë kjo në të cilën policia ka ndalur 27 persona.

Në Gjilan policia ka ndaluar nëntë persona, në Prishtinë shtatë, në Mitrovicë janë ndalur gjashtë persona, dy persona në Ferizaj dhe një nga Departamenti i Kufirit. Ndërsa në Pejë, Gjakovë dhe veri të Mitrovicës nuk është regjistruar asnjë rast për mosveprim sipas dispozitave shëndetësore gjatë epidemisë.

Aktualisht në Kosovë, me vendim të qeverisë, janë të mbyllura të gjitha restorantet, dyqanet, lokalet e qendrat tregtare, si masë parandaluese për mos përhapje të koronavirusit. Ndërsa qytetarët lejohen të dalin nga shtëpitë e tyre vetëm 90 minuta në ditë duke respektuar rregullin me numrin e parafundit të letërnjoftimit./RTV21.tv