Pas debatit të djeshëm mes deputetit të BDI-së Arbër Ademi dhe deputetit të ASH-së Hali Snopçe se deri ku janë punët për konviktin e Universitetit të Tetovës, Televizioni 21 gjatë ditës së sotme vizitoi këtë konvikt.
Arbër Ademi : “Projekt I BDI-së ka qenë edhe është dhe po finalizohet konvikti I UT-së”.
Snopçe : “Përsëri në të ardhmen”.
Arbër Ademi: “Jo jo në të ardhmen po ju nuk jeni i informuar por më lejoni, nuk je i inforormuar dhe po gabon tash të tregoj se ku gabon, dhe ju them merreni kamerën e televizionit dhe nesër mos e pritini pasnesër dhe shkoni se pjesa fizike 2.7 milion euro dhe në kohën time gurthemeli është vendosur edhe në kohën time, objekti karabina ka përfunduar dhe tash po punohet brenda por nuk është i njoftuar zotëri Snopçe”.
Në bazë të dokumetacionit, financues i këtij projekti është Ministria e Arsimit dhe Shkencës, ndërsa realizues i projektit është kompania Moding nga Tetova.
Ky konvikt si iniciativë ekziston që nga viti 2016 ku si ministër i Arsimit ishte tashmë i ndjeri Abdilaqim Ademi, ndërsa vetëm në 22 shtator të vitit 2016, u hap tender për ndërtimin e objektit edhe atë si projekt fillestar ishte paraparë ndërtimi i një konvikti shtatë katësh. Por më pas Ministria e Arsimit ndryshoi projektin duke e bërë atë pesëkatësh, duke i larguar nga objekti dy kate dhe përafërsisht rreth 1400 metër katrorë. Tenderin për ndërtimin e objektit e fitoi Kompania Moding nga Tetova me pronar Salim Hasani, ndërsa vlera e tenderit është 166 milion e 581 mijë denarë me gjithë TVSH. Vendimi për fillimin e punëve u bë i plotfuqishëm më 30 mars të vitit 2018 me çka tregon edhe ky dokument, ndërsa në bazë të marrëveshjes që është arritur në atë kohë mes Ministrisë së Arsimit ku ministër ishte PIshtar Lutfiu dhe pronarit Salim Hasani, objekti do të duhej që të përfundonte në fund të muajit prill të këtij viti. Këtë e tregon edhe neni 3 i marrëveshjes së nënshkruar mes palëve. Në bazë të marrëveshjes së arritur dhe në bazë të planit që është bërë në konviktin do të duhet të ketë 308 shtretër për studentë.
Ndërkaq, në bazë të pamjeve të xhiruara gjatë ditës së sotme, nuk është në fazën përfundimtare, fasada është bërë pjesërisht vetëm në pjesën ballore.