Koncert fundviti për Nexhmije Pagarushën! Filharmonia e Kosovës erdhi në Shkup sepse në Prishtinë nuk ka kushte

TË FUNDIT

Filharmonia e Kosovës mbajti koncertin e fundvitit në sallën e Filharmonisë së Maqedonisë, ndërsa koncerti iu përkushtua bilbilit të muzikës shqipe, tashmë të ndjerës Nexhmije Pagarusha.

Gjatë këtij koncerti u interpretua edhe vepra e Avni Mulës, i cili gjithashtu ndërroi jetë këtë vit.

Në koncert u interpretuan edhe vepra të shumë artistëve të shquar shqiptarë.

Për shkak të mungesës së një salle të tillë në Kosovë dhe për shkak të pandemisë, organizatori i koncertit tha se zgjidhja e vetme ka qenë salla e Filharmonisë së Maqedonisë, por u shpreh se një gjë e tillë nuk ka qenë e vështirë për shkak se Shkupi është afër.

“Fatmirësisht nuk e kemi shumë larg Shkupin, nuk është larg edhe për publikun e Prishtinës plus që këtu mundësia është që të prezantohemi edhe para një publiku që zakonisht nuk e ka mundësinë të na shohë në koncerte”, tha Dardan Selimaj – organizator dhe menaxher i Filharmonisë të Kosovës.

E për vështirësitë e anës artistike foli dirigjenti Gridi Kraja.

 “Kishte njëfarë vështirësie sepse ishin ca materiale disi të vjetra dhe nuk mund të gjendeshin notat dhe me stafin jemi detyruar të bëjmë orkestracione të reja nga fillimi, për tu përshtatur ashtu siç i ka kënduar e madhja Nexhmije Pagarusha. Megjithatë ishte një koncert shumë shumë i mirë”, potencoi Gridi Kraja – dirigjent.

Edhe Selimaj edhe Kraja thanë se janë të kënaqur nga pjesëmarrja e publikut në sallë. Ndërsa shpresojnë që edhe Kosova të bëhet me një objekt të Filharmonisë të standarteve të tilla si kjo në Maqedoni.

 “Presim që në vitin 2021 e para të jemi gjithë shëndoshë e mirë dhe e dyta që autoritetet e Prishtinës ta shohin si opsion atë që duhet të bëjnë në Prishtinë. Salla e koncerteve në Kosovë është e domosdoshme, mungon prej shumë vitesh dhe besoj se është momenti i fundit që të merren hapa në këtë drejtim”, tha Dardan Selimaj – organizator dhe menaxher i Filharmonisë të Kosovës.

 “Në Prishtinë duhet patjetër të kemi një sallë, duhet një shtëpi për filharmoninë që duhet të përfshijë ambinetet e provave, ambiente si këtu që janë për fat të keq për ne e për fat të mirë për ju këtu, pra ambiente të shkqëlqyera”, theksoi Gridi Kraja – dirigjent.

Publiku ishte me maska e në distancë e në fund punëtorët e Filharmonisë bën edhe dezinfektimin e sallës. Nexhmije Pagarusha ka lindur në 7 maj 1933 dhe ndërroi jetë më 7 shkurt të këtij viti. Ajo mbahet si mbretëresha e muzikës shqiptare. Është e njohur për interpretimet e saj të shkëlqyera në muzikën popullore dhe opera.