Zëdhënëset e LSDM-së dhe VMRO-DPMNE-së, Bogdanka Kuzeska dhe Marija Miteva, e shpjeguan lidhshmërinë e kryetarëve të partisë, Venko Filipçe dhe Hristijan Mickoski, me kompanitë bullgare. Nga LSDM i bënë thirrje partisë në pushtet që të përgjigjet për financimin e VMRO-DPMNE-së dhe nëse financohet me mjete nga kompania bullgare nga Petriçi, në pronësi të baxhanakut të kryeministrit Mickoski.
“Në Petriç, Bullgari, në rrugën Anton Popov nr.57 është regjistruar kompania DANO TRANS SHPKP, e baxhanakut të Mickoskit – Jordanço Janev, nga Strumica. E pyesim sot Hristijan Mickoskin, a ka kompani me emra të njëjtë apo ngjashëm edhe në Maqedoni? A janë këto kompani dhe persona financues të Mickoskit dhe VMRO-DPMNE-së? – tha Bogdanka Kuzeska nga LSDM.
“Më vjen keq që Kuzeska dhe LSDM shërbehen me të pavërteta dhe manipulime, duke u munduar që në atë mënyrë të krijojnë gënjeshtra, ta fshehin të vërtetën”, u shpreh Marija Miteva nga VMRO-DPMNE.
Dje nga VMRO-DPMNE akuzuan se Filipçe qëllimisht nga lista anketuese të Komisionit Antikorrupsion e ka shmangur kompaninë në pronësinë e tij, që është regjistruar në Petriç, Bullgari. Sipas VMRO-DPMNE-së, kjo kompani nuk është regjistruar për shkak se mund të lidhet me një kompani tjetër nga Maqedonia-Medikal 420, për prodhimin e marihuanës prej ku janë zhdukur substanca narkotike.
“Bëhet fjalë për kompani që nuk është aktive, që aspak nuk ka qenë aktive dhe siç thash në këtë konferencë për media, qëllimi i vetëm i VMRO-DPMNE-së se pse ka filluar me këtë sërë gënjeshtrash dhe manipulimesh është pikërisht ajo që e thamë sot – që t’i maskojnë bizneset e të afërmve dhe familjarëve të Mickoskit në, po ashtu, në Petriç, Bullgari”, shtoi Bogdanka Kuzeska nga LSDM.
“Ja të themi se nuk iu përgjigjen pyetjeve të këtilla, unë do të parashtroj pyetje të tjera – nëse është e vërtetë se një kompani nga Maqedonia që është e afërt me familjen e ish kryetarit të LSDM-së, paguan para kompanisë bullgare që është në pronësi të ish kryeministrit dhe kryetari të LSDM-së? – potencoi Marija Miteva nga VMRO-DPMNE.
VMRO-DPMNE dhe LSDM i dhanë kohë njëra-tjetrës për t’iu përgjigjur pyetjeve, ndërsa në të kundërtën, siç thonë, do të vazhdojnë të publikojnë informacione. Kompanitë që akuzojnë njëra-tjetrën janë regjistruar në distancë prej 5 km në linjë ajrore në qytetin bullgar Petriç.