Kërçovë, bizneset e vogla drejt mbylljes, këtë vit nuk ka remitanca, shpresat i kanë tek shteti

Bizneset e vogla në Kërçovë rrezikojnë mbylljen nëse kriza me Covid-19 vazhdon edhe muajt në vazhdim.

Këtë situatë e ka vështirësuar më shumë edhe mosardhja e mërgimtarëve në vendlindje, duke ditur që ata përveç që vizitojnë familjarët e tyre e mbushin edhe arkën e shtetit.

Pronarët e bizneseve të vogla janë të shqetësuar nga ky fakt dhe nuk kanë shpresa se do të mund të vazhdojnë të funksionojnë edhe disa muaj nëse kriza me pandeminë zgjat.

“Nëse situate vazhdon kështu do e kemi të vështirë, me të vërtetë e kemi të vështirë, ndihma nga shteti nuk kemi deri më tani asgjë hiq vetëm ata rrogat 14 mijë e 500 denar, por harxhimet nuk mund ti mbulojmë me ata rroga kemi shpenzime, paguajmë qira, energji elektrike , jemi shumë dobët – tha një afarist.

“Bizneset  e vogla janë problem, këtë vit për fat të keq shumë mërgimtarë nuk erdhën, nuk e di nëse kriza vazhdon kështu edhe 6-7 muaj mendoj se bizneset e vogla do të mbyllen” – tha një afarist.

Kryetari i Komunës së Kërçovës Fatmir Dehari tha se me aq mundësi sa kanë, janë munduar ti ndihmojnë disa biznese të cilat nuk punuan muaj të tërë siç është pjesa e gastronomisë.

“Ne si institucion lokal, me atë kapacitet që kemi me ata mundësi që kemi kohë më parë kemi marr masa për pjesën më të goditur duke vlerësuar bashkërisht edhe me ekspertë tjerë, siç ishte pjesa e gastronomisë , kafiteritë që nuk punuan një periudhë të gjatë kohore vlerësuam se janë pjesa që duhet mbështetur së paku me ata mundësi që kemi dhe vlerësuam që të mos tatimohen së paku këtë vit. Edhe hapësirat publike që i shfrytëzojnë nuk ua tatimojmë” – deklaroi Fatmir Dehari – Kryetar i Komunës së Kërçovës.

Qeveria kohë më parë vendosi që ti ndihmojë bizneset me rrogë prej 14,500 denarve por sipas pronarëve të bizneseve kjo ndihmë është e pamjaftueshme për të mbajtur gjallë një biznes. Ata kërkojnë që së paku tu hiqen tatimet e shtetit për këta muaj.