Kërçovarët në protestë kundër shtrenjtimit të rrymës! Policia nuk i lejon të kalojnë në rrugën magjistrale

Në Kërçovë sot u mbajt protesta e tretë kundër shtrenjtimit të energjisë elektrike për 7.5%. Protestuesit fillimisht u mblodhën në sheshin e qytetit nga ku edhe shpalosën kërkesat e tyre që kanë ndaj Komisionit Rregullatorë për energjetikë.

Ata kërkojnë nga Kuvendi i Republikës së Maqedonisë së Veriut të suprimojë Komisionin Rregullator për energjetikë i cili prekë xhepin e të varfërve. Gjithashtu ata kërkojnë që Kuvendi të formojë një trup të pavarur që do të jetë në shërbim të qytetarëve.

Më pas protestuesit u nisën drejt bulevardit kryesor të qytetit për të arritur deri te stacioni i autobusëve në Kërçovë, por te rreth rrotullimi i dytë afër stacionit policor, ata hasën në kordonin policor i cili kishte bllokuar rrugën që protestuesit të mos kalojnë në rrugën magjistrale.

Edhe pse protestuesit kërkonin me ngulm që policia ta lëshonte rrugën, e njëjta nuk ndodhi as pas debateve të shumta, andaj protestuesit vendosën që të kthehen dhe ta vazhdojnë marshin në krahun tjetër të bulevardit.

Organizatorët thanë së nuk do të ndalen derisa të plotësohet kërkesa e tyre për uljen e çmimit të energjisë elektrike./TV21