Teatri i Tetovës është në gjendje të mjerueshme. Nuk ka kushte elementare për të funksionuar.
Kështu mbrëmë në Click Plus u shpreh aktori Muzafer Etemi, i cili së fundmi është inkuadruar në politikë, përkatësisht Aleancës për Shqiptarët.
“Pamundësia për ta ushtruar profesionin tonë si profesionistë, sepse për fat të keq, kam kulturë dhe nuk dua të shprehem, por besoni që në Tetovë nuk ka tualet në objektin e teatrit.
Mund të funksionoj aty një artistë? Lëri tjerat grimi, veshjet, dushet, gjëra që janë të nevojshme, nuk i kemi ato”, deklaroi Muzafer Etemi, aktor.
Aktori Burhan Amiti tha se po të ishte gjithçka mirë në këtë shtet, artistët nuk do të kishte nevojë të futen në politikë.
“Sot e kësaj dite nuk kemi një objekt konkret, ndërkohë objekti tjetër ka filluar, është dashur të mbaroj vitin 2018, ende s’ka përfunduar dhe këta e provokojnë edhe më shumë atë shpirtin rebelues të aktorëve. Kjo është edhe një arsye që i detyron që aktorët të merren ose me politik”, u shpreh aktori Burhan Amiti.
Grubi tha se politika i shfrytëzon artistët nëpër fushata , e më pas i harron.
“Janë dy mënyra se si kyçen artistët në politikë, faktikisht të vjen ftesa nga partitë politike për arsye se partisë politike i nevojiten emra edhe emrat marrin me veti fansat e shikueshmërinë. Kam pasur rastin të njoh edhe në vendet tjera artistë që janë kyçur në politikë, por veprimtaria e tyre është zhvilluar ndryshe. Tek ne është e kundërta ne e shfrytëzojmë artistin deri sa mbahen zgjedhjet, pas zgjedhjeve artisti harrohet”, deklaroi violinisti, Blerim Grubi.
Muzafer Etemi tha se politika ka keqpërdorur mjete dhe ka sakatuar teatrin, por drejtori i Teatrit Shqiptarë Adem Karaga mendon ndryshe.
“Politika nuk ka censurë, mos të ketë censurë në artë, për sakatim ke shumë të drejtë edhe me këtë kur nuk ka mjete të mjaftueshme dhe përfaqësim të denjë të projekteve cilësore. Unë nuk e di sa janë keqpërdorur mjete. Sot në Ministrinë e Kulturës ke institucionet hetimore, policore, financiare, që po flasim për dy vite të shkatërruara, që ne do të duhet të paguajmë haraqin e kësaj pune”, vlerëson Karaga.
Karaga shtoi se edhe pse është zgjedhur drejtor nga politika, ai ka duart e lira për të vepruar.