Komisioni Evropian nuk tërhiqet nga fillimi i negociatave me Maqedoninë e Veriut. Pas takimit të kryeministrave të Maqedonisë së Veriut dhe Bullgarisë, Zoran Zaev dhe Bojko Borisov në Sofje, Komisioni Evropian mbetet në qëndrimin se të dy palët duhet vazhdojnë me përpjekjet për gjetje të zgjidhjes për problemet e tyre bilaterale, tha për MIA-n, zëdhënësja e Komisionit Evropian për zgjerim, Ana Pisonero.
“Vazhdojmë të shpresojmë se mund të arrihet marrëveshje për korrnizën negociuese së shpejti me qëllim që të mbahet konferenca e parë ndërqeveritare sa më shpejt që është e mundur”, tha Ana Pisonero, zëdhënësja e KE për zgjerim.
E kryeministri i vendit , Zoran Zev tha se asnjë vend në botë nuk negocion për gjuhën dhe identitetin e as ne nuk do të bëjmë këtë. Zaev shprehet optimist edhe pse deklaroi se ekziston mundësi e madhe që të mos kemi konferencën e parë ndërqeveritare me Bashkimin Evropian.
“Po bëjmë përpjekje deri në momentin e fundit. Do të japin gjithçka që mundemi nga ana jonë, si energjinë, mençurinë dhe shkathtësinë por e dini se ka punë për të cilët askund në botë asnjëherë nuk negociohet, e as tek ne nuk do të ndodhë një gjë e tillë. Ekziston mundësi serioze që ne mos të kemi konferencën e parë ndërqeveritare me Bashkimin Evropian”, pohoi Zoran Zaev, kryeministër.
E shefi i diplomacisë së vendit, Bujar Osmani tha se ende nuk mund të thotë se cili do të jetë rezultati i bisedimeve midis Shkupit dhe Sofjes, por theksoi se pala e Maqedonisë do të bëjë gjithçka që është e mundur për të përfaqësuar interesat e vendit me dinjitet dhe brenda kësaj të gjejë zgjidhje të përbashkët.
“Ende po bisedojmë, nuk mund të prejudikoj se si do të jetë rezultati. Çështja është shumë komplekse dhe e ndjeshme, ndërkaq periudha është shumë e shkurtër. Qasja jonë është se do të punojmë deri në minutën e fundit për të argumentuar së pari pikëpamjet tona mbi këtë çështje, për të sjellë më afër pikëpamjet e ndryshme”, deklaroi Bujar Osmani, ministër i Punëve të Jashtme
Sipas Osmanit zgjidhja është kthimi i besimit tek Marrëveshja për fiqnjësi të mirë e cila është garancë për tejkalim të çdo dallimi që mund te kemi. Më 17 nëntor duhet të mbahet Këshilli i ministrave të BE-së në të cilin do të bisedohet për zgjerimin dhe në të cilin duhet të merret vendim për miratim të korrnizës negociuese të BE-së me Maqedoninë e Veriut, por Bullgaria tani për tani nuk tërhiqet dhe konsideron se nuk mund të japë dritë jeshile derisa nuk gjendet kompromis rreth çështjeve për gjuhën, shkurtesën e emrit të shtetit dhe temat historike.