KE brengoset për gjendjen e gjyqësorit në RMV/ Reijnders: Duhet të sigurohemi që të mos vjetrohen lëndët

Në kuadër të forumit BE-Ballkani Perëndimor, në Kuvend u mbajt sesioni i dytë dedikuar qeverisjes të së drejtës dhe reformave gjyqësore. Ministri i Drejtësisë Krenar Lloga, përmendi rëndësinë e procesuimit efektiv të rasteve të korrupsionit dhe krimit të organizuar ndërsa si Qeveri, tha se po përpiqen maksimalisht për përparim në këtë fushë, veçanërisht përmes rekomandimeve që vijnë nga monitorimi i OSBE-së.

“Rëndësia për përmirësimin e procesuimit efektiv të rasteve të krimit dhe korrupsionit të organizuar, shpesh herë është kritike, për forcimin e besimit të qytetarëve në sistemin e gjyqësorit dhe sundimin e ligjit. E shprehim përkushtimin tonë për arritjen e përparimit në këtë fushë, posaçërisht edhe përmes implementimit të rekomandimeve nga projekti për monitorim rajonal të gjykimeve të OSBE-së”, tha Krenar Lloga – Ministër i Drejtësisë.

Por çfarë vlerësimi të sistemit gjyqësor ka Komisioni Europian? Eurokomesari Didier Reijnders, tha se Komisioni Europian po brengoset për situatën aktuale në Maqedoninë e Veriut, veçanërisht në pjesën e vjetërsimit të lëndëve me profil të lartë të korrupsionit. Megjithatë, të gjitha vërejtjet tha se do të publikohen muajin e ardhshëm në raportin e përgjithshëm të Komisionit sa i përket sistemit gjyqësor.

“Ju përmendët se ka vështirësi për lëndë të caktuara, kjo do të jetë pjesë e diskutimeve në nivel bilateral jo vetëm për gjykatën penale por edhe për reformave të ligjit dhe kapacitetit për përndjekje penale në të ardhmen për këto raste. Brengosemi për përndjekjet penale. Sa i përket përmbajtjes, duam të sigurohemi që të mos vjetrohen përndjekjet për raste të profileve të larta. Këtë e pamë në muajt e kaluar”, pohoi Didier Reijnders – Eurokomesar.

Por si duhet përmirësuar gjendja aktuale në gjyqësor meqenëse vetëm një përqindje e vogël e qytetarëve i besojnë sistemit juridik? Ministrja e drejtësisë së Spanjës, Maria Cuenca, tha se gjërat më të rëndësishme janë që gjykatësit të jenë të paanshëm, sistemi juridik të jetë i shpejtë dhe efikas, ndërsa gjykimet duhet të jenë të shpejta.

“Qytetarët të cilët nuk besojnë në institucionet e tyre, asnjëherë nuk do u drejtohen atyre institucioneve dhe do të ndjehen të pambrojtur dhe se nuk u respektohen të drejtat elementare. Sistemi juridik duhet të jetë i shpejtë, i qasshëm, efikas për të gjithë njerëzit të cilët jetojnë në territorin e vendit. Duhet t’i garantojë çdo personi në çdo vend kudo që të ndodhet, në sistemin europian, t’i ketë të drejtat e njëjta në gjithë territorin e Bashkimit Europian”, deklaroi Maria Pilar Lop Cuenca.

Përpos reformave gjyqësore, në sesionin e sotëm është diskutuar edhe për përparimin e aktiviteteve të përbashkëta lidhur me agresionin rus në Ukrainë si dhe për paraqitjen e prioriteteve të kryesimit të ardhshëm belg.