Irlanda nuk do të marrë pjesë në Eurovision 2027, që do të zhvillohet në Bullgari. Lajmin e ka bërë të ditur transmetuesi publik irlandez RTE, i cili konfirmoi gjithashtu se nuk do ta transmetojë konkursin.
RTE tha se pjesëmarrja e Irlandës nuk mund të justifikohet për shkak të humbjes së vazhdueshme të jetëve në Gaza dhe krizës humanitare atje.
Në deklaratën e tij, transmetuesi irlandez u shpreh se situata në Gaza vazhdon të rrezikojë jetën e shumë civilëve. RTE tha gjithashtu se mbetet i shqetësuar për mungesën e aksesit të pavarur të gazetarëve ndërkombëtarë në territor.
Irlanda, e cila e ka fituar Eurovisionin shtatë herë, nuk mori pjesë as në edicionin e vitit 2026, kur Izraeli mori pjesë në konkurs dhe përfundoi në vendin e dytë, pas Bullgarisë. Martin Green, drejtori i Eurovision Song Contest, tha se organizatorët e respektojnë vendimin e RTE-së, edhe pse shprehën keqardhje për mungesën e Irlandës.
Ai theksoi se Eurovisioni synon të bashkojë artistë dhe transmetues nga vende të ndryshme përmes muzikës dhe krijimtarisë, veçanërisht në një periudhë kur bota po përballet me konflikte dhe ndarje të shumta.
Organizatorët sqaruan se transmetuesit vendosin çdo vit nëse do të marrin pjesë në edicionin e ardhshëm. Ata thanë se do të vazhdojnë dialogun me RTE dhe shpresojnë që Irlanda të rikthehet në konkurs në të ardhmen.