Me 65 vota PËR dhe 15 KUNDËR, Kuvendi dha dritë jeshile për huamarrjen nga Hungaria në vlerë prej 500 milionë eurove. Zëvendësministri i financave, Nikollçe Jankullovski, tha se qëllimi i huamarrjes është gjendje e jashtme financiare e qëndrueshme dhe mbështetja e reformave. Pas akuzave në opinion, ai konfirmoi se provizioni i këstit do t’i takojë kompanisë hungareze.
“Ai provizion është rreth 70 mijë euro dhe në krahasim me euro-bondin që e kemi dhënë në vitin 2023, për të njëjtën shumë të huamarrjes, kemi paguar 880 mijë euro”, tha Nikollçe Jankullovski – zëvendësministër i Financave.
Opozita nuk i kurseu kritikat. Sipas tyre, huamarrja fsheh lëshime të dyshimta politike dhe paraqet goditje ndaj sovranitetit të shtetit. Deputeti Fatmir Bytyqi pyeti pse VMRO-DPMNE fshehtas ka negociuar në Budapest për kredinë derisa ende ka qenë në opozitë.
“A duam që vendi ynë të futet në orbitën e shteteve që e shfrytëzojnë fuqinë e tyre ekonomike që t’i minojnë themelet e lirisë dhe drejtësisë. Kjo nuk është thjesht huamarrje. Ky është kurth potencial që mund ta fusë Maqedoninë e Veriut në rrugën drejt nënshtrimit politik dhe varësisë ekonomike nga regjime, regjime të cilat nuk janë të harmonizuar me interesat e qytetarëve tanë dhe idealet e demokracisë”, deklaroi Fatmir Bytyqi nga LSDM.
Shumica këto akuzat i vlerësoi si qesharake.
“Dëgjova shumë akuza qesharake se paratë kanë qenë nga Kina, se nuk e di prej ku janë marrë…pse dikush nga opozita ka negociuar dhe ka dakorduar…Desha ta pyes Venko Filipçen-pse nuk i pengonte kur nga opozita Hristijan Mickoski ka dakorduar donacione në kohën e koronës nga Sllovenia dhe Hungaria”, potencoi Bojan Stojanovski nga VMRO-DPMNE.
Tani pritet që ligji për huamarrjen të shpallet në Gazetën Zyrtare pas çka ministrja e financave Gordana Koçoska-Dimitrieska do të marrë autorizime që ta nënshkruajë marrëveshjen. Kryeministri Hristijan Mickoski paraprakisht theksoi se pjesa e mbetur prej gjysmë miliardë eurove nga Hungaria ndoshta do të kërkohet në janar për të paguar borxhe të tjera.