Shpëtohet nga zjarri vendi antik i Lojërave Olimpike në Greqi

Autoritetet greke prej dje urdhëruan evakuim të ri të ishullit Evboja, në afërsi të Athinës, ndërsa zjarrfikësit arritën të shuanin zjarrin në afërsi të vendit antik të Lojërave Olimpike, në pjesën perëndimore të Peloponezit, përderisa vendi tri ditë me radhë po lufton me stuhinë e zjarrit.

Temperaturat prej mbi 40 gradë Celsius dhe era e fuqishme në pjesë të ndryshme të vendit gjatë ditëve të fundit shkaktuan më shumë se 150 zjarre, bashkë me zjarret në Turqi dhe pjesët tjera të Mesdheut.

Nga e marta në ishullin Evboja, në afërsi të Athinës, janë evakuuar disa fshatra. Rreth 85 persona arritën të ngjiteshin në varkë nga plazhi, derisa digjeshin pishat dhe retë nga tymi ngriheshin lartë në ajër.

Autoritetet dje evakuuan shumë persona nga Evboja, pasi paralajmërimi për zjarrin kishte ardhur nga kambanat kishtare. Më shumë se 170 zjarrfikës dhe gjashtë aeroplanë e shuajnë zjarrin në këtë rajon.

Dy fshatra në rajonin e Peloponezit pardje ishin evakuuar, sepse në afërsi të lokalitetit arkeologjik të Lojërave antike Olimpike shpërtheu zjarr.

“Pas luftës me zjarrin gjatë gjithë natës, duket, zjarrfikësit arritën ta shpëtojnë këtë lokalitet, ndërsa pasuria antike është jashtë rrezikut”, deklaroi ministrja e Kulturës, Lina Mendoni për televizionin ANT1.

Ky lokalitet, nga i cili flakadani olimpik e fillon udhëtimin e tij deri në qytetin nikoqir të Lojërave Olimpike moderne, është një nga atraksionet më të famshme turistike greke, i njëjti nga zjarri rrezikohej edhe gjatë vitit 2007.