Fondi Monetar Ndërkombëtar dhe Banka Botërore do të analizojnë, ndërsa Qeveria do të vendosë nëse do të rritet mosha e pensionimit. Ministrja e Financave Gordana Dimitrieska-Koçoska pohon se edhe pse po shqyrtohen zgjidhje të mundshme, Qeveria për momentin nuk ka marrë asnjë vendim për çfarëdo reforme pensionale. Do të pritet dokumenti nga institucionet ndërkombëtare.
“Ata tani kërkuan të bëjnë një analizë — ne ramë dakord. Do të bëjnë analizë të fondit pensional dhe do të japin rekomandime të caktuara, gjë që nuk do të thotë se ato duhet të pranohen domosdoshmërisht nga Qeveria. Ramë dakord — do të punojnë për diçka të tillë. Nuk dua të paragjykoj paraprakisht, por probabiliteti që të thonë ta rrisim pragun, respektivisht moshën e pensionimit, është diçka e pritshme. Nëse Qeveria do ta pranojë apo jo — do të shohim”, tha Gordana Dimitrieska-Koçoska
Koçoska thotë se ajo që është shqetësuese është gjendja e keqe demografike, plakja e popullsisë — trend i pranishëm edhe në Evropë. Por qëndrimi i saj personal është se nuk duhet të rritet mosha e pensionimit, por të lihet si e drejtë zgjedhjeje.
“Në lidhje me moshën e pensionimit, personalisht mendoj se duhet të lihet si e drejtë zgjedhjeje. Të mbeten vitet siç janë — të jepet mundësia për ata që duan të vazhdojnë. Ka qytetarë që punojnë në kushte më të rënda — besoj se shumë prej tyre presin dhe shpresojnë të pensionohen sipas ligjit ekzistues. Ndërsa ka edhe të tillë për të cilët puna është shumë e lehtë, ose më e lehtë në krahasim me të tjerët — dhe ata sigurisht do të punonin edhe deri në 70, 71, 72 vjeç”, deklaroi Gordana Dimitrieska-Koçoska
Reforma pensionale sërish u bë temë aktuale në opinion pasi revizorët konstatuan se po thellohet deficiti në Fondin Pensional, ndërsa Fondi është borxhli për sigurim shëndetësor të pensionistëve, por edhe nuk i transferon rregullisht paratë në Shtyllën e Dytë Pensionale. Koçoska pohon se për këtë vit janë siguruar mbi 300 milionë euro që nga shtylla e parë duhet të transferohen në fondin e dytë pensional. Por nuk po thellohet vetëm deficiti në Fond, po rritet edhe deficiti në arkën shtetërore. Deri në fund të vitit do të ketë huamarrje të re në tregun e jashtëm. Sa do të jetë shuma — do të përcaktohet më vonë.
Koçoska në raportin për dy vjet pune të Ministrisë së Financave tha se borxhi publik në tremujorin e parë të këtij viti është 58.9 përqind e BPV-së dhe se Qeveria ndjek një politikë të ndryshme — huamarrja të shkojë në investime, e jo në konsum.