“Gratë në sipërmarrësi, çelësi për forcimin e ekonomisë”/Saraçini-Kelmendi: Gratë dinë të rrezikojnë më shumë sesa burrat

Biznesi dhe ekonomia kanë nevojë për cilësitë e grave, mendimet e tyre të ndritura, shpirtin optimist, temperamentin dhe vullnetin, qëndrueshmërinë për drejtësi dhe oreksin për zhvillim që gratë e sjellin me vete u shpreh zëvendëskryeministri për çështje ekonomike Fatmir Bytyqi në Samitin e Tretë Vjetor të Platformës Kombëtare për Sipërmarrësinë e Grave me temën “Gratë në Sipërmarrësi – Çelësi për Forcimin e Ekonomisë”.

“Mbështetja dhe promovimi i grave në biznes jo vetëm që do të kontribuojë në uljen e pabarazisë gjinore por edhe do ta përmirësojë produktivitetin dhe konkurrencën e ekonomisë tonë.”- deklaroi Fatmir Bytyqi, Zëvendëskryeministër për Çështje Ekonomike

Ky samit u organizua nga Shoqata e Grave Afariste në partneritet me Fondacionin për Menaxhment dhe Hulumtim Industrial dhe Lidhja e Odave Ekonomike të Maqedonisë. Diskutuan përfaqësues të institucioneve, organizatave dhe gratë sipërmarrëse.

“BE thërret të gjitha qeveritë, përfshirë edhe ato si anëtare të ardhshme që të sigurojnë të drejtat e barabarta për gratë dhe qasje në resurset ekonomike.”- deklaroi Ben Nupnau, zëvendës shef i delegacionit të BE-së në Shkup”- deklaroi Ben Nupnau, zëvendës shef i delegacionit të BE-së në Shkup.

Mes shumë grave sipërmarrëse, në këtë ditë të parë të samitit, foli edhe drejtoresha gjenerale e 21MEDIA, Afërdita Saraçini-Kelmendi. Në fjalën e saj ajo u përqendrua te ajo se si gratë mund të drejtohen tek vetja që të mund të inkurajohen për të bërë biznes dhe për t’u lidhur. Duke folur për rrugëtimin e saj si drejtoreshë e dy televizioneve, në Kosovë dhe Maqedoninë e Veriut, tha se fillimet nuk i ka pasur aspak të lehta, por shtoi se motoja që e ka udhëhequr në punë është të menduarit në gjërat e mëdha, nëse do të bëhesh i madh.

“Gratë njihen për rreziqet, janë të kujdesshme por dinë të rrezikojnë më shumë sesa burrat. Këtë e di nga bashkëpunëtorët e mi, sepse kur nis projekt do më thonë “jo, jo prit, numrat…” , unë nuk dua ti shoh numrat, nuk më interesojnë, nuk dua t’i shoh. Unë e shoh projektin, se ku është qëllimi im, atje! E tash kur flasim për qëllimin, atëherë unë, ju, të gjithë ne në rajonin e Ballkanit kemi në qëllim. E ato janë ato 3 miliardë të BE-së që vijnë në Ballkan për mbështetje ekonomike. A do të jemi edhe ne si gra pjesë e atij kulaçi që do të ndihmojë të rritemi dhe zhvillohemi, e kjo është puna jonë. Që të jemi të suksesshëm, duhet kooperim rajonal. Që të mund të shtyjmë më tej në rrugën europiane , integrimin e tregjeve, do të duhet që edhe ne të integrohemi.”- deklaroi Afërdita Sarçini-Kelmendi, drejtoreshë gjenerale “21 Media”

Në samit, mes tjerash u tregua se pagat e grave në vend janë 17.5 për qind më të ulëta se ato të burrave. Bizneset e tyre janë të përfaqësuara vetëm me 30 për qind dhe nuk është shfrytëzuar potenciali me të cilin mund të përmirësojnë gjendjen në ekonomi.