Modelet kineze të inteligjencës artificiale kanë zënë pesë vendet e para në përdorimin javor të njësive të të dhënave, sipas “OpenRouter”, një renditje globale e modeleve të mëdha gjuhësore (LLM).
Nga 28 korriku deri më 3 gusht, modelet e inteligjencës artificiale në mbarë botën përpunuan 56.8 trilionë njësi të dhënash. Prej tyre, modelet kineze zinin 28.13 trilionë, duke shënuar javën e 14-të rresht që Kina ka mbajtur kryesimin.
Nëntë nga 10 modelet më të përdorura në botë javën e kaluar ishin kineze. “V4-Flash” i “DeepSeek”-ut kryesoi renditjen me 7.1 trilionë njësi të dhënash në përdorim javor, i ndjekur nga “MiMo-V2.5” i “Xiaomi”-së me 5.4 trilionë, “Hy3” i “Tencent”-it me 4.89 trilionë, “V4-Pro” i “DeepSeek”-ut me 3.1 trilionë dhe “GLM-5.2” i “Z.AI”-së me 2.87 trilionë
“V4-Flash” i “DeepSeek”-ut kushton 0.14 dollarë për një milion njësi të dhënash hyrëse dhe 0.28 dollarë për një milion njësi të dhënash dalëse. Sipas “Artificial Analysis”, kostoja mesatare e saj është 3 centë për test, krahasuar me 86 centë të “Kimi K3” të “Moonshot”-it, 1.86 dollarë të “GPT-5.6 Sol” të “OpenAI”-së dhe 3.15 dollarë të “Claude Fable 5” të “Anthropic”-ut.
Krahasimi ofron një masë më realiste të vlerës sesa vetëm çmimi, sepse ai merr parasysh sasinë e të dhënave që një model duhet të përpunojë dhe krijojë për të kryer një detyrë. Një model me çmim të ulët mund të jetë ende i shtrenjtë nëse kërkon shumë më tepër hapa për të dhënë një përgjigje.
Në Treguesin e Inteligjencës, “V4-Flash” i “DeepSeek”-ut shënoi 50 pikë nga 100 të mundshme, në të njëjtin nivel me “Gemini 3.6 Flash” të “Google”-it dhe një pikë pas “Muse Spark 1.1” të “Meta”-s dhe “GLM-5.2” të “Z.AI”-së. “Kimi K3” i “Moonshot”-it mori 57 pikë, ndërsa “Claude Opus 5” i “Anthropic”-ut, dhe “Fable 5” e “GPT-5.6 Sol” të “OpenAI”-së shënuan nëntë ose më shumë pikë më lart.
“Artificial Analysis” përdor një kornizë me nëntë pika referimi, që përfshin kodimin, arsyetimin dhe detyrat në rrethanat e punës reale, për të përpiluar tabelat e rezultateve të modelit.
Ajo që i ka dhënë “DeepSeek”-ut një epërsi në tregun global të zhvilluesve është inxhinieria: përfundime më të mira, memorizim dinamik KV, planifikim i trafikut dhe përmirësim i kontekstit të gjatë.
Gjithnjë e më shumë kompani të huaja po integrojnë API-të e “DeepSeek”-ut, ndërsa më shumë zhvillues ndërkombëtarë po përdorin platformën e tij.
Ndërkohë të hënën, “Alibaba” publikoi modelin e vet më të madh dhe më të aftë të AI-së deri më sot, “Qwen3.8-Max”, i cili nuk është shumë prapa në madhësi në krahasim me një ofertë nga rivali vendas “Moonshot AI” i dalë muajin e kaluar.
Për miliona zhvillues të AI-së në të gjithë botën, ndryshimi tashmë po bëhet i qartë: më shumë zgjedhje, kosto më të ulëta dhe më pak pengesa për inovacionin po riformësojnë ekosistemin global të AI-së