Sipas të dhënave më të fundit, në të gjithë botën me koronavirusin e ri deri më tani janë infektuar gjithsej 3.016.633 njerëz. Nga këta, 207.971 kanë vdekur dhe 888.551 janë shëruar.
– Ushtria ruse ka raportuar 2.090 raste të të infektuarve me koronavirus midis anëtarëve kadetëve dhe shërbyesve civilë të saj.
– Në Holandë, 43 njerëz vdiqën brenda një dite nga Kovid-19 dhe 400 janë infektuar.
– Në 24 orët e fundit, në Belgjikë kanë vdekur 113 njerëz dhe 553 janë infektuar. Kështu, numri i pacientëve në vend ka arritur në 46.689, ndërsa numri i vdekjeve 7.207.
– Punëtorët e ndërtimit u kthyen në katedralen e djegur të Notre Dame në Paris dhe vazhduan me restaurimin e saj pas një pauzë prej një muaj e gjysmë për shkak të pandemisë së koronavirusit.
– Kancelari austriak Sebastian Kurc deklaroi se do të angazhohet që kompanitë kryesore vendase të paguajnë taksa më të ulëta, ndërsa kompanitë shumëkombëshe do të duhet të paguajnë më shumë në mënyrë që të përshpejtojnë rimëkëmbjen e ekonomisë për shkak të krizës me Kovid-19.
– Gjermania sot lejoi kthimin e nxënësve të klasës përfundimtare në bankat shkollore pas një muaj e gjysmë mësimi në distancë.
– Pjesa e dytë e gjykimit për ekstradimin e themeluesit të Uikiliks, Xhulian Asanzh në SHBA nuk do të zhvillohet në maj, siç ishte planifikuar, sepse marrjet në pyetje janë anuluar për shkak të pandemisë së koronavirusit.
– Një komisare e lartë e KB-së për të drejtat e njeriut u ka bërë thirrje vendeve në të gjithë botën që të respektojnë sundimin e ligjit gjatë pandemisë së koronavirusit, duke i kufizuar para se gjithash masat e jashtëzakonshme me qëllim të shmangies së një “katastrofe të të drejtave të njeriut”.
– Në Italinë Veriore në Bergamo, është nisur një hetim për atë se si është vepruar në fillim të pandemisë Kovid-19, konfirmoi prokurorja Maria Kristina Rota.
– Qeveria italiane është nën kritika serioze për planet e saj për të çliruar vendin nga një prej karantinës më të rrepta dhe më të gjata në botë. Kryeministri Gjuzepe Konte njoftoi dje se masat do të lehtësohen më 4 maj, por shumë besojnë se mesazhi i tij është konfuz dhe i pamjaftueshëm.
– Indonezianët presin një kthim në jetën normale muajin tjetër. Popullata e katërt më e madhe në botë ka regjistruar 9.096 raste të infektuar, që është numri i dytë në Azinë Juglindore pas Singaporit.
– Britania e Madhe rrezikon më shumë se 100.000 vdekje nga koronavirusi deri në fund të vitit nëse qeveria i lehtëson kufizimet që t’i mbrojë ata që janë më në rrezik, tha epidemiologu kryesor britanik, Neil Ferguson./MIA