Gjendja ekonomike është serioze, rroga të denja dhe ardhmëri Evropiane, por gjithçka do të varet nga korona kriza

Gjendja ekonomike është serioze, paralajmëroi disa herë me radhë ministri i Financave, Fatmir Besimi. “Kjo nuk është për ta frikësuar dikë, por për ta kuptuar seriozitetin e situatës”, porositi ai.

“Nuk do të jetë e lehtë. Në gjysmën e parë të vitit, ekonomia shënon ulje prej 6.4%. Në pajtueshmëri me rebalancin, që është bërë sipas projeksioneve, të ardhurat janë reduktuar për 11.5% në raport me buxhetin inicial. Borxhi shtetëror në fund të tremujorit të dytë këtë vit paraqiste 50.7% nga borxhi i përgjithshëm publik – 59.5%”, tha Ministri i Financave, Fatmir Besimi.

Kompanitë duhet të dinë se me kohë do t’u kthehet TVSH-ja, tha ministri duke shtuar se shteti do t’i realizojë të gjitha obligimet e tjera ndaj sektorit privat. Ai premtoi ardhmëri evropiane dhe rroga të denja.

“Ajo që është më e rëndësishme është që deri në fund të mandatit ta kthejmë ekonominë në rritje të qëndrueshme prej 4% që do të krijojë bazë solide për dyfishim të rritjes mesatare afatgjate prej 2,6% për periudhën e kaluar 10 vjeçar për 4 – 5% në periudhën e ardhshme. Pas përfundimit të krizës të mundësojmë rritje të rrogës mesatare deri në fund të mandatit prej 20 deri 30%, që do të shkaktojë rritje të pagës minimale”, u shpreh Fatmir Besimi – Ministër i Financave.

Ministri paralajmëroi ndihmë të drejtpërdrejt prej 300 milionë eurove për kompanitë e huaja dhe ato vendore. Sa i përket buxhetit, Besimi theksoi se ai është stabil dhe se do të ketë financa të mjaftueshme për realizimin e tij.

“Varësisht se sa do t kushtojë pakoja e masave ne do ta ndjekim realizimin e Buxhetit se ku do të ketë hapësirë dhe dihet se sipas të gjitha gjasave nuk do të realizohen shpenzimet e planifikuara të Buxhetit. Në këtë mënyrë do të bëjmë riprogramim”, potencoi Ministri i Financave, Fatmir Besimi.

Realizimi i investimeve kapitale deri më sot, sipas ministrit është 41%, dhe nëse disa prej tyre nuk realizohen, të njëjtat do të prolongohen dhe mjetet do të mund të përdoren në pakon e katërt të masave. Ministri shpreson se mandati i tij do të mbarojë me sukses edhe pse, siç tha, kjo gjë nuk do të jetë e lehtë.