Gashi dhe MPB me këndvështrime të ndryshme  – Gashi: Sigurimi im e qetësonte situatën

Presidentja e Kosovës, Vjosa Osmani, ka falënderuar kryeparlamentarin Afrim Gashi për ndihmën e dhënë. Ai thotë se ka intervenuar që të qetësohen tensionet në aeroport, por nga ana tjetër nga MPB kanë thënë se ka qenë sigurimi i Gashit që ka shtyrë një polic tjetër, i cili punonte në aeroport. Gashi thotë se kushdo që mund të ketë tejkaluar autorizimet e tij duhet të mbajë përgjegjësi.

“Sigurimi im shkoi për ta qetësuar situatën dhe nëse dikush dëshiron të qetësojë diçka dhe nëse dikush dëshiron ta interpretojë këtë si tendencë për t’u bërë incident, këtë e bëjnë ata njerëz”, tha Afrim Gashi.

Gashi nuk tha se një person i sigurimit të tij ka bërë incident në aeroport, përkundër asaj që e njoftoi MPB. Sipas policisë, pjesëtari i tyre tashmë është nën hetim në departamentin për kontroll të brendshëm.

“Një person nga sigurimi i kryetarit të Kuvendit Gashi (polici) ka ardhur me dy persona të tjerë (policë) dhe ka filluar të kërcënojnë punonjësit e TAV dhe të pyesë se kush i ka shkaktuar problem Presidentes. Në të njëjtën kohë ka shtyrë edhe një punonjës policie që punonte në pikën kufitare. Menjëherë është njoftuar Departamenti për Kontroll të Brendshëm, Hetime Penale dhe Standarde Profesionale dhe po merren masa për zbardhjen e rastit në koordinim me Prokurorinë Publike për PKKO, pas çka do të dorëzohen parashtresat përkatëse”, thotë MPB.

G: Personi në fjalë ende punon në sigurimin Tuaj?

-Cili person?

G: Ai që është denoncuar në aeroport.

-Ju keni njohuri?

G: Nga MPB thonë se kanë denoncuar një person të tillë.

-Cili është ky person?

G: Unë nuk e tregova me emër, nuk e di. Vetëm pyes.

-Kur nuk e dini, pse pyesni se ka një person të caktuar? D.m.th. nuk ka pasur…

Dje nga Kuvendi demantuan përfshirjen e anëtarëve të sigurimit personal të Afrim Gashit në këtë incident. Ata vetëm ishin të pranishëm për të qetësuar situatën që ndodhi për shkak të, siç thonë nga kabineti, moskuptimit mes sigurimit të presidentes së Republikës së Kosovës Vjosa Osmani dhe pjesëtarëve të sigurimit të aeroportit.