Valerie Pecresse do të jetë kandidatja presidenciale e republikanëve, tha të shtunën partia kryesore e krahut të djathtë të Francës.
Pecresse fitoi 61% të votave në raundin përfundimtar të zgjedhjeve paraprake të partisë, në garën ku Eric Ciotti, një deputet nga Nice, mori vetëm 39% të votave.
Është hera e parë që partia konservatore franceze zgjedh një grua si kandidate të saj.
“Unë mendoj për të gjitha gratë franceze sot dhe u them faleminderit anëtarëve të partisë për guximin e tyre”, tha Pecresse në një konferencë për shtyp pas shpalljes së rezultateve.
“E djathta republikane është kthyer”, shtoi ajo.
Një politikane me përvojë, Pecresse, 54 vjeç, ka qenë ministre për arsimin e lartë, për buxhetin dhe ka qenë zëdhënëse e qeverisë nga viti 2007 deri në 2012.
Pozicionimi i Pecresse në qendrën e djathtë mund të përbëjë një sfidë për presidentin aktual Emmanuel Macron, i cili arriti të tërheqë votat e mbështetësve të republikanëve me prirje qendrore në zgjedhjet e mëparshme.