Francezët do të duhet sërish të fillojnë të mbajnë maska në vende ku ka shumë njerëz, posaçërisht në transportin publik, pasi Franca po lufton me valën e re të infektimit me Kovid-19, deklaroi mbrëmë ministrja e Shëndetësisë, Brizhit Boruginjon.
“Nuk them se duhet të jetë e obliguar, por kërkoj nga populli i Francës të vendos maska në transportin publik. Jo vetëm se e rekomandoj, ju lutem ta bëni këtë, duke shtuar se maskat përsëri duhet të mbahen në ambiente të mbyllura, siç janë vendet e punës dhe shitoret”, tha ajo për Er-Te-El, duke shtuar se kjo është “obligim qytetar”.
Franca regjistroi 17.601 raste të reja të infektimit me koronavirus gjatë 24 orëve të kaluara, që është numri më i madh nga 18 prilli.