Filipçe: Vjeshta do të sjellë shumë rreziqe! Gripi sezonal-rrjedhja e hundës, virusi korona-humbje e nuhatjes dhe shijes!

Para nesh është periudha në të cilën duhet të mbrohemi edhe më shumë dhe t’i respektojmë masat kundër Kovid-19, apelon ministri i shëndetësisë Venko Filipçe pas 6 muajve që kur u regjistrua rasti i parë me Kovid-19 në vendin tonë.

“Kjo krizë shëndetësore e cila është më e madhe në 100 vitet e fundit, solli pikëllim për ata që i humbën më të afërmit e tyre, solli pasiguri ekonomike për të gjithë duke e ndryshuar jetën tonë. Me respektim të masave mbrojtëse, përveç që mbroni veten dhe të afërmit tuaj, kontribuoni edhe në përpjekjet e punëtorëve shëndetësore të cilët luftojnë për jetën  e çdokujt”, deklaroi Filipçe.

Filipçe theksoi se ministria e shëndetësisë punon për përgatitjet në periudhën e vjeshtës, duke i përforcuar kapacitete spitalore dhe kuadrot. Ai dje paralajmëroi se nuk e përjashton mundësinë që çerdhet të fillojnë me punë në shtator ndërsa për shkollat është parashikuar të fillojnë me mësim të kombinuar më 1 tetor. Një pjesë e epidemiologëve kanë mendim të kundërt, sipas tyre shkollat dhe çerdhet ende nuk duhet të hapen.

“Nuk jemi të përgatitur plotësisht, në shkollat e qyteteve nuk i ka të gjitha kushtet për prani fizike për shkak se ka shumë nxënës ndërsa hapësirat janë të vogla, do të jetë e vështirë që të realizohet mësimi. Në mënyrë intensive është punuar në periudhën e kaluar, përgatiten kapacitetet spitalore dhe spitalet e montuara që do të ndihmojnë shumë. I vetmi problem është se sa do të mund të përgjigjemi nga aspekti i personelit mjekësor”, tha Sashko Ollumçev, Epidemiolog.

Mjeku Nikolla Panovski mendon se fuqia e valës së vjeshtës do të varet nga ajo se sa qytetarët do t’i respektojnë masat dhe rekomandimet e mjekëve.

“Nëse krijohen aerosolë brenda hapësirave, nëse nuk hapen dritaret, e nuk do të hapen për shkak të motit të ftohtë dhe ajrit të ndotur, mund të infektohet çdokush që do të jetë i pranishëm në hapësirë, veçanërisht nëse hapësira është e vogël. Ky është rreziku më i madh për shkak se mund të infektohen dhjetëra njerëz brenda një dite”, deklaroi Nikolla Panovski, Mjek.

Në lidhje me çmimin e testeve PCR, Panovski mendon se shteti duhej t’i kyçë në sistem me çmim të fondit, sepse, siç thotë, tani testohet vetëm ata që kanë para.

“Nëse i shihni analizat, do të shihni se njerëzit me të ardhura më të larta më shumë bëjnë teste, nuk kanë kohë për të pritur, për dallim nga ata më të varfrit që nuk kanë as për bukë e jo të mendojnë që të testohen. Të gjitha laboratorët duhej të kyçen dhe të marrin leje që të kyçen në sistem duke iu paguar një çmim të caktuar, jo më i lartë se 1500 denarë”, shtoi Panovski.  

Panovski apelon qytetarët t’i respektojnë masat për shkak se dallimi i vetëm mes gripit sezonal dhe virusit korona është rrjedhja e hundës dhe humbja e nuhatjes dhe shijes, por sipas tij simptoma e dytë paraqitet pas dita ditësh dhe mund të jetë vonë për të reaguar.