U premtua për këtë javë, mirëpo ilaçi “Kalydeco” për tre pacientet me Fibrozë cistike, ende nuk ka ardhur. Ishte vetë Ministri i Shëndetësisë Venko Filipçe i cili premtoi që deri këtë të premte medikamenti duhet të ishte në dispozicion të tre vajzave me këtë sëmundje të rrallë. Ministri tha se po vonohen procedurat dhe se nuk ka informacione se kur pacientet mund ta kenë terapinë, sepse tashmë po presin kohë të gjatë.
“Jo ende jo. Ashtu më informuan nga kompania, sot nuk kam informacione, do të pres nga ta të dhëna, e do të them sërish se duhet që procedura të rrumbullakohet në Malmed, që të mund të jepet leje për përdorim, pra edhe këtu ka një procedurë që duhet të përfundohet”, tha Filipçe.
Meqë druanin se gjendja do t’u përkeqësohej, tre vajzat e reja, të cilat vuajnë nga një mutacion specifik gjenetik i Fibrozës Cistike para një jave dolën me konferencë për media, duke apeluar të institucionet përgjegjëse t’ua sigurojnë terapinë e duhur, që t’u përmirësohet përditshmëria dhe gjendja shëndetësore.
“Çdo ditë bie të fle me lutje që të nesërmen të zgjohem. Nuk e di. U lus që ta sigurojnë ilaçin. Kështu nuk jetohet. Dua që si çdo njeri normal të punoj, të ec, të mos jam e varur prej askujt”, tha Dragana Gjorgjievska.
“Nuk dua të shkoj nëpër spitale më. Dua të jam e lirë ashtu siç kam qenë më herët me përdorimin e ilaçit”, tha Flora Gashi.
Ilaçi Kalydeco (Ivacaftor) u sigurua për dy muaj për këto paciente nga Fondi Shëndetësore, me qëllim që të testohet efikasiteti. I njëjti është treguar mjaft efektiv, prandaj pacientet luten që sa më shpejtë ta kenë në dispozicion. Deri sa të vijë ilaçi, Merali, Flora dhe Dragana do të vazhdojnë të jenë të lidhura për aparatin e oksigjenit, por edhe të shtrira në spital duke marrë vazhdimisht terapi.