Nën drejtimin e një prokurori publik nga Prokuroria Themelore për Ndjekjen e Krimit të Organizuar dhe Korrupsionit (OJO GOKK), njësitë e Ministrisë së Punëve të Brendshme (MPB) sot, pas urdhrave të siguruar nga Gjykata Themelore Penale – Shkup, janë kryer kontrolle në disa lokacione në qytetin e Shkupit, për shkak të dyshimeve të bazuara për veprat penale fajde dhe pastrim parash dhe përfitime të tjera nga vepra penale.
Prokurori, duke vepruar sipas kallëzimit penal të paraqitur nga MPB, ka lëshuar urdhër për fillimin e procedurës hetimore kundër 12 personave të dyshuar, për të cilët ekziston dyshim i bazuar se nëntë prej tyre, si bashkëkryerës ose ndihmës, kanë kryer të dyja veprat penale, ndërsa tre janë të dyshuar për veprën penale të pastrimit të parave dhe përfitimeve të tjera nga një vepër penale, njoftojnë nga Prokuroria Publike.
Më tej në njoftim thuhet se që nga fillimi i vitit 2022 deri më sot, të nëntë të dyshuarit janë organizuar në një grup kriminal që është marrë me dhënien e parave me marrëveshje, duke kërkuar përfitime pasurore të pajustifikuara në para, mjete ose pasuri të paluajtshme. Ata kanë shfrytëzuar gjendjen e rëndë financiare të viktimave, duke u dhënë atyre para hua me interes prej 5% deri në 15% në muaj, e cila rritej për çdo vonesë në pagesë. Nga viktimat kërkohej të kthenin shumën e huas me interesin e llogaritur, ose të paguanin interesin çdo muaj. Kur viktimat nuk kishin mundësi të kthenin paratë, të dyshuarit kërkonin që ata të dorëzonin apo të ngarkonin pasurinë e tyre, duke e kaluar në emër të ndonjërit prej të dyshuarve.
Pagesa e shumave bëhej drejtpërdrejt përmes ndonjërit prej të dyshuarve ose përmes llogarive bankare, nga llogaria e viktimës në atë të ndonjërit prej të dyshuarve.
Paratë që viktimat i kthenin në mënyrë të pajustifikuar, përfundonin në llogaritë bankare ose në sefet e të dyshuarve, pas çka këto përfitime pasurore futeshin në mënyra të ndryshme në rrjedhat legale financiare. Ekziston dyshim i bazuar se gjatë të njëjtës periudhë, 12 të dyshuarit dhe një person juridik i dyshuar, si grup kriminal i organizuar për pastrim parash, kanë fituar përfitim pasuror të paligjshëm prej 125.033.527 denarësh, të përfituar nga veprat e kamatës.
Një pjesë e parave të përfituara, që të dyshuarit i kanë marrë në disa raste nga persona fizikë, në llogaritë ose dorazi, me qëllim që të duket sikur janë mjete të ligjshme, janë përdorur për të kryer transaksione ndaj llogarive të personave juridikë dhe fizikë, një pjesë janë marrë për nevojat personale të të dyshuarve, janë përdorur për të blerë pasuri të paluajtshme dhe të luajtshme, si dhe për të jetuar në luks, ndërsa një pjesë e madhe janë tërhequr në para të gatshme.
Prokurori publik, gjatë ditës së nesërme, do t’i dorëzojë gjykatësit të procedurës paraprake pranë Gjykatës Themelore Penale – Shkup propozimet përkatëse për sigurimin e pranisë së të dyshuarve.