Edhe pas një muaji nga zgjedhja e kryetares së re të Komisionit për Çështjet e Zgjedhjeve dhe Emërimeve, dhe nga kompletimi i tij me anëtarë, ende nuk është caktuar seancë për zgjedhjen e gjykatësve kushtetues. Nga opozitarja VMRO-DMNE kritikojnë se pushteti vazhdon të manipulojë me përzgjedhjen e gjykatësve dhe se tenton ta partizojë Gjykatën Kushtetuese. Paralajmërojnë se së shpejti do t’i paraqesin propozimet e tyre për gjykatës kushtetues.
“Ne, gjatë seancave kur bëhej ndryshimi i anëtarëve të Komisionit për Zgjedhje dhe Emërime, thamë se kemi një situatë të shkëlqyeshme në vend, mundësi të zgjedhim gjykatës të pavarur kushtetues, sepse në fakt plenumi është i shumicës dhe asnjë kandidat i cili do të propozohej bile edhe nga Komisioni i cili ka shumicë, nga opozita, nuk do të mundej të kalonte në plenum nëse bëhet fjalë për propozim partiak”, tha Mile Lefkov, deputet i VMRO-DPMNE-së.
Kryetarja e re e Komisionit për Çështjet e Zgjedhjeve dhe Emërimeve, thotë se tani për tani nuk kanë marrë asnjë propozim për gjykatës të rinj kushtetues dhe se për këtë arsye nuk e thirr seancën.
“Bisedova me anëtarët e Komisionit dhe pres që së shpejti të më lajmërojnë për propozimet e tyre. Menjëherë pasi të marr informacion se ka propozime, do ta caktoj vazhdimin e Komisionit për propozim të gjykatësve kushtetues, por edhe për të gjitha procedurat e tjera të papërfunduara që kanë të bëjnë me zgjedhjen e organeve të tjera për të cilat është kompetent Kuvendi”, tha Marija Georgievska, kryetare e Komisionit për zgjedhje dhe emërime.
Nga Kushtetuesja thonë se ende nuk kanë asnjë informacion – nëse së shpejti do të realizohet përzgjedhja e gjykatësve.
“Deri te Gjykata Kushtetuese nuk ka mbërritur asnjë informacion zyrtar për zgjedhjen e gjykatësve të rinj kushtetues. Komunikimi i fundit formal me kryetarin e Kuvendit, Talat Xhaferi është mbajtur në shkurt të këtij viti, kur përmes një letre apeluam që gjykatësit të zgjedhen sa më shpejt që është e mundur. Prej atëherë nuk kemi asnjë informacion zyrtar lidhur me atë çka po ndodh dhe përse nuk është bërë përzgjedhja e gjykatësve”, thanë nga Gjykata Kushtetuese.
Së fundmi, kryetarja e Gjykatës Kushtetuese, Dobrilla Kacarska, tha se punojnë në prag të kuorumit me vetëm 5 gjykatës, duke shtuar se edhe po t’i merrnin vendimet unanimisht, megjithatë pesha do të ishte e ndryshme në qoftë se vendosnin të gjithë 9 gjykatësit. Deri në fund të këtij viti, njërit prej gjykatësve i skadon mandati, që do të thotë se Gjykata do të jetë e bllokuar, sepse nuk do ta kenë shumicën e nevojshme për punë.