Për shkak se janë ndryshuar emrat e disa rrugëve, qytetarët patjetër duhet të ndryshojnë edhe dokumentet personale. Por terminët e caktuar për tu fotografuar në MPB duhet t’i anulojnë për shkak se nuk e kanë dokumentacionin e plotë. Shkurtimisht thënë nëpër një golgotë të tillë kalojnë qytetarët të cilët shkojnë për të nxjerrë letërnjoftim ose pasaportë për shkak se emri i rrugës ku jetojnë është ndryshuar.
“Çfarë të bëjmë ne që Koce na i ndryshoi adresat, ndërsa Petre na i ktheu. Deri ku jemi. Të hënën isha për letërnjoftim tek Beko. Nëpunësja më tha se për disa rrugë MPB i ka vendosur ndryshimet në sistem ndërsa pritet që këtë gjë ta bëjnë dhe për rrugët tjera. Kontrollo deri ku janë ndryshimet, ndoshta edhe e ytja është vendosur”, reagon qytetari.
Për të nxjerrë Certifikatë nga Qyteti, qytetarët patjetër të dorëzojnë fletë pronësi jo më të vjetër se 6 muaj e cila kushton 250 denarë si dhe taksë prej 50 denarëve. Më pas, dokumenti nuk jepet menjëherë në sportel në barakën numër 16, por duhet të kalojnë 5-10 ditë. Nga MPB thonë se me vendim të Qytetit të Shkupit janë ndryshuar emrat e rrugëve të kryeqytetit, ku janë përzgjedhur 185 rrugë të reja për të cilat nevojitet Certifikatë nga Qyteti i Shkupit me qëllim të konfirmimit të gjendjes momentale me ermin e rrugës që të tejkalohen problemet të cilat janë vërejtur pas ndryshimit të emrit të rrugëve.
“Interesi i qytetarëve është më i rëndësishëm. Jo interesi politik. Për mua, së paku si njeri dhe politikan, është shumë e rëndësishme se çfarë do të bëjmë për qytetarët sesa të artikulojmë ndonjë interes politik dhe tani a do të quhet rruga Aminta Treti ose si do të quhet nuk e di, në fund të fundit kjo sjell dëm për qytetarët në vend të interesit politik. Pse dëm, sepse i obligojmë qytetarët që të ndryshojnë letërnjoftimet në periudhë të shkurtër kohore”, deklaroi Oliver Spasovski, ministër për Punë të Brendshme.
Nga Qyteti i Shkupit thonë se kërkesa për nxjerrjen e Certifikatës për adresën e saktë është pjesë përbërëse e procedurës administrative, në përputhje me nenin 93 të Ligjit për procedurë të përgjithshme administrative, procedurë administrative në shkallën e parë, jepet më së voni në afat prej 30 ditëve nga dita e parashtrimit të kërkesës.
“Duke pasur parasysh karakterin e dokumentit, nga ana e Sektorit për punë komunale pranë Qytetit të Shkupit, i njëjti përgatitet për 3 deri më 5 ditë pune, ndërsa nëse duhet dokumentacion shtesë ose inspektim në vend afati mund të prolongohet”, thonë nga Qyteti i Shkupit.
Emrat e rrugëve të Shkupit së pari u ndryshuan në kohën e ish-kryetarit Koce Trajanovski. Pasi që në krye të kryeqytetit erdhi Petre Shilegov, u kthen emrat e vjetër të rrugëve, ndërsa një pjesë e tyre morën emra të ri.