–Të rritet shkëmbimi tregtar nga 207 milionë në një miliard euro, të hapen korridore për vendet pa dalje në det, të hiqen barrierat doganore dhe Durrësi të bëhet alternativë e portit të Selanikut, këto ishin porositë kryesore të biznesmenëve nga Maqedonia e Veriut dhe Shqipëria në forumin ekonomik “Përtej Kufijve”, që u mbajt sot në Shkup.
Pjesëmarrësit theksuan nevojën për lidhje më të mirë infrastrukturore dhe paraqitje të përbashkët në tregjet e treta.
Zëvendëskryeministri dhe ministri i Transportit, Aleksandar Nikoloski, deklaroi se bashkëpunimi ekonomik mes dy vendeve është i mirë, por larg potencialit real. Sipas tij, shkëmbimi tregtar vitin e kaluar arriti në 180 milionë euro, ndërsa në tremujorin e parë të vitit 2026 ka qenë 38 milionë euro.
“Është paradoksale që arrijmë të tregtojmë me Gjermaninë, Francën dhe Britaninë e Madhe, por jo mjaftueshëm me njëri-tjetrin në rajon”, tha Nikoloski, duke shtuar se përveç infrastrukturës nevojitet edhe ndryshim i mentalitetit.
Ambasadori i Shqipërisë në Shkup, Denion Meidani, theksoi se Korridori 8 është projekt strategjik që i vendos dy vendet në hartën evropiane të transportit.
“Shqipëria e sheh Maqedoninë si partner natyror. Është zgjedhje nëse do të mbetemi në periferi apo do të ndërtojmë fqinjësi moderne dhe prosperitet”, deklaroi ai.
Ndërkaq, kryetari i Odës Ekonomike të Maqedonisë së Veriut, Branko Azeski, kritikoi mungesën e bashkëpunimit më të madh ekonomik, duke thënë se “kriminelët po i shfrytëzojnë më mirë avantazhet e bashkëpunimit sesa biznesmenët”.
Në fokus të forumit ishin investimet, infrastruktura dhe turizmi, ndërsa organizatorë ishin Oda Ekonomike e Maqedonisë së Veriut dhe Ambasada e Shqipërisë. Forumi i ardhshëm pritet të mbahet në Tiranë.