Do të hiqet kuota 20% në Kushtetutë! Mickoski: Jam i gatshëm që të bisedoj për 20%, por edhe për heqjen e badenterit

Lideri i VMRO-DPMNE-së, Hristijan Mickoski e përsëriti edhe njëherë se është i gatshëm që të bisedojë për heqjen e 20% të bashkësive etnike.

“Jam i gatshëm që të bisedoj për të gjitha. Jam i gatshëm që të bisedojë edhe për heqjen e përqindjeve, jam i gatshëm që të bisedoj dhe po pres përkrahjen e partive e tjera politike për një njësi zgjedhore, jam i gatshëm që të bisedoj edhe për heqjen e Badenterit, balancuesit, sepse po shoh se disa subjekte politike duan ta anashkalojnë Marrëveshjen e Ohrit. Hajde atëherë bashkërisht të krijojmë një shoqëri të cilën do ta projektojmë që nga sot dhe në 50 vitet e ardhshme”.

Këto ditë lideri i BDI-së, Ali Ahmeti tha se është çështje kohe se kur do të hapet Kushtetuta për të hequr kuotën prej 20%. Edhe kreu i Aleancës Ziadin Sela sqaroi se kërkojnë që gjuha shqipe të jetë e barabartë me gjuhën maqedonase dhe kështu të regjistrohet në Kushtetutë. Prej kësaj partie sot e përsëritën kërkesën e tyre.

“Gjuha shqipe është gjuha shqipe dhe si e tillë duhet të qëndrojë edhe në Kushtetutë. Për momentin kjo është përpjekja jonë më e rëndësishme”, thanë nga ASh.

Dje edhe kryeministri Kovaçevski përsëriti se nëse fillon procesi i ndryshimeve brenda Kushtetutës, pret që të gjendet zgjidhje e cila do të jetë në dobi të të gjithë qytetarëve të shtetit. Megjithatë, përsëriti se për këtë duhet të arrihet konsensus nacional dhe se duhet shumicë e dy të tretave në Kuvend.

“Ne si shtet tashmë kemi në Evropë ligje dhe rregullime, madje edhe rregullime kushtetuese ku në piedestal janë të drejtat e bashkësive më të vogla duke marrë parasysh se pjesa e madhe prej tyre janë përfshirë në Kushtetutë. Po ashtu kemi edhe Ministri e cila është e obliguar për sistem politik për të drejtat e bashkësive më të vogla. Është legjitime që të fillojë procesi për ndryshimet kushtetuese ku marrin pjesë parti politike, megjithatë edhe ekspertë, për të gjetur zgjidhje që do të jetë përfitim për të gjithë qytetarët në shtet”, tha Kovaçevski.

Ndryshe në kushtetutë, në ligjet që kanë të bëjnë me shqiptarët nuk përmendet fjala “populli shqiptar”, por “20% e popullsisë”.