Djegia e veturave të EVN-së, ndalohet Krenar Osmani. Thotë se u arrestua për shkak të statusit në Facebook

Pas djegies së  dy veturave të EVN Maqedoni në qytetin e Tetovës  pas mesnate, policia ka privuar nga liria  deri në orët e mëngjesit Krenar Osmanin, ish kryetarin e tifo-grupit Ballistët I cili është edhe njëri nga anëtarët e këshillit organizativ për protestat kundër shtrenjtimit të energjisë elektrike.

Osmani një një deklaratë për TV21, thotë se në polici është mbajtur deri në orën 8 të mëngjesit  dhe se  kundër tij është ngritur vepër penale  me procedurë të rregulltë gjyqësore.

“Më morën për bisedë informative  pastaj doli arrestim,  me ndërlidhjen me  vënjen flakë të veturave të EVN-së, lidhjen e bën me statusin tim. “Doni lojë, lojë do ketë ” nga ora 8 e mëngjesit më liruan dhe  vepra do të shkojë me procedurë të rregullt gjyqësore, do jetë jetë vepër penale në bazë të nenit 828  alineja një, rrezikim I sigurisë së përgjithshme dhe zjarrvënie” u shpreh Osmani.

Nga Sektori për Punë të Brendshme në Tetovë, deklarojnë se pas zbardhjes dhe dokumentimit të rastit, kundër të dyshuarit do të përgaditet parashtresë adekuate.

“Më datë 14.08.2020 në orën 01.20, pjesëtarët e policisë nga SPB-Tetovë, në rrugën “Lenin” e kanë privuar nga liria personin K.O. (43) nga Tetova, për shkak të dyshimeve se me lëndë djegëse, ka shkaktuar zjarr në veturën ,,Daçija Duster“ me targa të Shkupit dhe veturën ,,Nisan“ poashtu me targa të Shkupit, pronë e EVN-Maqedoni, të parkuara në rrugën “Ivo Lola Ribar” dhe rrugën “180” në Tetovë. Nga djegia e veturave janë shkaktuar vetëm dëme materiale, dhe përvec veturave të EVN-së, zjarri ka kapluar edhe një veturë ,,Golf“ me targa të Tetovës” informojnë nga SPB Tetovë.

Por edhe pas kësaj Osmani bën apel që të dilet masovikisht në protestë , pasi që këto janë protesta sociale  dhe do të jenë të qeta.

“T’i marrim miqtë, shokët  dhe të dalim, unë vetë do  marrë motrën, gruan, vajzën dhe do I pri njërës pikë te monopolli dhe me masovitetin tonë ta faktorizojmë këtë kauzë  e cila është e sinqertë fisnike dhe sociale” thotë Krenar Osmani nga Këshilli Organizativ i protestave në Tetovë.

Në ora 18 pritet të protestohet në disa  qytete të Maqedonisë kundër shtrenjtimit  të  energjisë elektrike./TV21