Diskriminohet kampioni i karatesë! Abdurahim Idrizi mori vendin e parë, Federata në Europian dërgon Emil Pavllovin

Mori vendin e parë në Kampionatin kombëtar në  kategorinë 60 kg në karate.

Por Abdurahim Idrizi nuk do ta përfaqësojë Maqedoninë në Kampionatin Evropian.

Kjo për shkak se në vend të tij do të shkojë dikush tjetër qe e ka votuar Komisioni i Federatës së Karatesë të Maqedonisë.

Babai, njëherit edhe menaxheri i Abdurahimit thotë se kjo që ka ndodhur është e padrejtë.

 “Dje u mbajt kampionati i Maqedonisë për senior, Abdurahim Idrizi sikur që është edhe rregull u paraqit në kategorinë në minus 60 kg dhe atje sipas të gjitha rregullave e mori vendin e parë.

Por pas gjitha gjërave që ka ndodhur, Federata e Karatesë së Maqedonisë ka marrë vendim që në këtë garë mos të shkojë kampioni por të shkojë një garues i cili nuk ka marrë pjesë në kampionat dhe me këtë është thyer rregullorja e federatës”, tha Alajdin Idrizi.  

Nga tre herë në ditë është stërvitur edhe gjatë pandemisë, për të arritur tek ëndrra, Abdurahimi thotë se këtë vendim nuk e ka pritur.

 “Gjatë karrierës sime 12 vjeçare ëndrra e vetme ka qenë që të marr pjesë në Kampionatet EvropIane, Botërore për senior sepse të gjitha këto tjerat kanë qenë jo zyrtare. Kampionati Botëror është ëndrra e vetme e çdo sportisti që fillon të merret me sport”, theksoi Abdurahim Idrizi – karateist.   

Kontaktuam edhe me Federatën e Karatesë së Maqedonisë së Veriut por nga atje në linjë telefonike thanë që ky vendim është marrë nga Federata.  

Në vend të Abdurahimit është votuar që të shkojë Emil Pavllov i cili nuk ka marrë pjesë fare në Kampionatin shtetëror, thotë babai i Abdurahimit.