Dhuna ndaj 17-vjeçarit me autizëm/ Inspektorati mohon se është lidhur me zinxhir në Spitalin Psikiatrik

Nuk është e vërtetë se ka qenë i lidhur me zinxhirë 17-vjeçari me autizëm që po trajtohej në Spitalin Psikiatrit në Demir Hisar, pohon drejtoresha e Inspektoratit Shëndetësor-Sanitar, pasi ky institucion ka bërë mbikëqyrje të jashtëzakonshme në Klinikë. Sipas drejtoreshës së inspektoratit fëmija ka qenë i lidhur me rripa lëkure dhe pëlhure dhe ka qenë sipas protokollit për veprim te pacientët shumë agresivë. Drejtoresha e Inspektoratit tregoi se pacienti është çuar në Klinikë Psikiatrike me kërkesë të prindërve me arsyetimin se ishte shumë agresiv. Pastaj me urgjencë e kanë sjellë për t’u kujdesur në spitalin e Demir Hisarit. Djali fillimisht ishte vendosur në repartin për adoleshentë, por për shkak të agresionit të madh ndaj pacientëve të tjerë, ai është vendosur për kujdesej në departamentin e meshkujve në një dhomë të izoluar.

“Pacienti është trajtuar dhe evidence mjekësore  është mbajtur çdo ditë për pacientin dhe sipas kompetencave tona e njëjta është e rregullt. Duhet të përmend se ato fiksues janë vetëm për pacientë që kanë sjellje të dhunshme, që janë agresivë, dhe nuk bëhet fjalë për zinxhirë ose mjete të tjera që u përmendën në media. Nga të gjitha mbikëqyrjet tona të rregullta deri më tani, sipas planit vjetor të Inspektoratit Shëndetësor-Sanitar, si dhe në mbikëqyrjet e jashtëzakonshme, nuk kemi hasur në Spitalet Psikiatrike objekte të tjera me të cilat do të thuhej se ata pacientë janë torturuar.”- deklaroi Renata Mladenovska, drejtoreshë e Inspektoratit Shëndetësor-Sanitar.

Por nëse drejtoresha e Inspektoratit Shëndetësor thotë se aty nuk kanë hasur në zinxhirë dhe mjete të tjera të ndaluara, të kundërtën ditë më parë e tha në TV21 Avokati i Popullit Naser Zyberi. Nga vizita e tij në Spitalet Psikiatrike kanë gjetur gjësende të ndaluara.

“Ne gjatë vizitës sonë në Demir Hisar gjetëm sende që shërbejnë për fiksim, e që janë të ndaluara edhe në bazë të rregullativës së vendit dhe konventave ndërkombëtare. Aty ishin drynat, aty ishin zinxhirët, aty ishin kabllot elektrikë,  të gjithë këto janë të ndaluara, fiksimi mund të bëhet vetëm me rrip dhe me lente, ka procedurë dhe protokoll se si bëhet kjo.”- tha Naser Zyberi, Avokat i Popullit.

Informacioni për rastin e fundit në Demir Hisar u bë publik pasi nëna e djalit 17-vjeçar, Salka Abudlovska, kur ajo publikoi një fotografi ku shihen shenjat e lidhjes së këmbëve të djalit të saj, i cili është me autizëm.

Ministri Fatmir Mexhiti sot ka publikuar një fotografi me Abudlovskën, e cila ia ka shpjeguar rastin. Mexhiti tregoi se do të bëhen përpjekje për të ndihmuar në përkujdesjen e këtij djali dhe theksoi se edhe pse është siguruar se janë respektuar të gjitha protokollet se spitali, do të jetë nën mbikëqyrje të rreptë që të mos lejojë trajtim jo të duhur të pacientëve në të ardhmen.