Rreth 60 gjykatës dhe 13 prokurorë që janë mbi 62 ose 64 vjeç prej nesër do të nisin të dalin në pension. Kjo sepse Kuvendi nuk arriti të votojë ndryshimet e Ligjit për Marrëdhënie pune, i cili do t’ua shtynte pensionimin për 3 vjet. Këto ndryshime sot e kishin afatin e fundit për votim, por nuk arritën në seancë plenare, për shkak të interpelancës ndaj kryeparlmanetarit Talat Xhaferi e cila do të zgjasë deri në mesnatë. Këtë për TV21 e konfirmoi edhe shefi i grupit parlamentar të LSDM-së, Jovan Mitrevski.
“Me shkulje të kabllove, shkatërrim të pajisjeve, grisje të letrave, zvarritje në komisione, e dje me replika ndërmjet veti, sollën në situatë që ligji të dështojë ta arrijë datën në të cilën duhet të sillet. VMRO-DPMNE ndoshta arriti ta shtyjë drejtësinë, por nuk mund dhe nuk do ta parandalojë”.- deklaroi Jovan Mitrevski, Koordinator GP LSDM.
Kreu i opozitares VMRO-DPMNE-së, Hristijan Mickoski, i pyetur i kundërshtojnë ndryshimet e këtij ligji, tha me to pushteti ka për qëllim që t’ua zgjasë marrëdhënien e punës gjykatësve dhe prokurorëve partiak.
“Dita do të kalojë dhe do të duhet që këta të dëgjueshmit e verbër partiak të LSDM-së dhe BDI-së të shkojnë në pensionin e pamerituar”.- tha Hristijan Mickoski, Kryetar VMRO-DPMNE.
Ministri i Drejtësisë, Nikolla Tupançevski, paralajmëron për implikime serioze.
“Shkuarja në pension e gjykatësve dhe prokurorëve publik do të thotë se numër i madh i procedurave do të duhet të nisin që nga fillimi. Të mos harrojmë se nuk bëhet fjalë për një a dy procedura. Kur ndryshohet gjykatësi procesi nis që nga fillimi”.- pohoi Nikolla Tupançevski, Ministër I Drejtësisë.
Tupançevski paralajmëroi po ashtu se rikthimi nga fillimi i disa lëndëve, nënkupton edhe vjetërsim i të njëjtave. Kjo është hera e parë në historinë e sistemit gjyqësor të vendit që kaq shumë gjykatës e prokurorë të dalin në pension. Zgjatja e marrëdhënies së punës së gjykatësve e prokurorëve ka qenë një prej opsioneve që të mos paralizohej sistemi. Ministri tregoi se dy propozimet e tjera janë që avokatë dhe bashkëpunëtorë profesionistë të mund të kyçen në sistem përmes një trajnimi të shkurtër, ose të rritet numri i dëgjuesve në Akademinë për Gjykatës dhe Prokurorë.