Erdhën për të parashtruar pyetje deputetësh në lidhje me “Monstrën” dhe për çështje tjera që kanë të bëjnë me shqiptarët, por u tërhoqën, për shkak se nuk u gjenden në maje të listës. Me të filluar seanca për pyetje deputetësh, shefi i grupit parlamentar i koalicionit “Aleanca-Alternativa”, Skender Rexhepi, kryeparlamentarin Talat Xhaferi e quajti “zëdhënës i BDI-së” që kërkon të heshtë opozitën shqiptare. Rexhepi u ankua se përse deputetët e opozitës shqiptare nuk janë ndër të parët në listën e deputetëve që duhej të parashtronin pyetje.
“Kryetari i Kuvendit gjatë gjithë kohës po luan rolin e zëdhënësit të BDI-së duke shkaktuar bllokadë të opozitës shqiptare. Jo rastësisht e kemi informuar që sot në pyetje deputetësh, paraqitet kryetari i Aleancës për Shqiptarët do të shtroj pyetje dhe ai është vendosur i 5 më radhë. Unë si koordinator i partisë politike jam i 13-ti, a nuk është kjo është ofenduese, kryetar i partisë të vendoset i pesti në listë”, tha Skender Rexhepi, koodinator i grupit parlamenar i Alternativës.
Kryeparlamentari Xhaferi, pohoi se lista e deputetëve të opozitës shqiptare ka ardhur me vonesë dhe se renditja e deputetëve bazohet në Rregulloren e Kuvendit.
“Të isha ashtu siç thua Rexhepi, unë do të duhej sot të kem një listë vetëm nga deputet e VMRO-DPMNE-së dhe “E Majta” për faktin që vetëm ato dy grupe kanë paraqitur listë në afatin e paraparë me rregullore. Rregullorja obligon që në mënyrë të barabartë të jenë të përfaqësuar deputetët të cilët parashtrojnë pyetje, në relacion dy me një, në favor të opozitës dhe kur i referohemi opozitës, në përbërje të opozitës si numër i përgjithshëm që jeni 58 deputet, në opozitë ju përfaqësoheni me 12 deputet që në relacion me 44 deputetët të VMRO-DPMNE-së jeni në relacion 3 në 1 të përfaqësuar”, deklaroi Xhaferi.
Procedurale kërkoi deputeti i ASH-së, Syrija Rashidi. Ai tha se në të ardhëmn nuk do të lejojnë të mbahet seancë për pyetje deputetësh nëse nuk janë ndër të parët në listë.
“Përsëris, nuk do të tolerojmë që në seancën e ardhshme por edhe në asnjë seancë të ardhshme për pyetje deputetësh, të mbahet seancë nëse opozita shqiptare nuk do të jetë ndër të parët për të parashtruar pyetje. Ndërsa sot në shenjë revolte të lojërave tua do të tërhiqemi nga lista dhe pyetjet të gjithë deputetët e opozitës shqiptare”, tha Rashidi.
Seanca plenare për pyetjet e të zgjedhurve të popullit, mbahet një herë në muaj, të enjten e fundit të çdo muaji. Të parët për të pyetur kryeministrin dhe ministrat janë zakonisht: deputetët e partive opozitare.