Daravellski në burg, lënda nuk është vjetërsuar/ Avokati kërkon rigjykim të rastit

Ish-drejtori i Doganave, Dragan Daravellski do të mbetet në burg për të vuajtur dënimin prej 7 viteve për keqpërdorim të detyrës zyrtare. Lënda e tij vjetërsohet në vitin 2028.

“Nga njoftimi i marrë nga gjykata në Kumanovë vjetërsimi absolut i vuajtjes së dënimit sipas aktgjykimit të Gjykatës Themelore Shkup, hyn në fuqi më 26 mars 2028.”- deklaroi Ministria e Drejtësisë.

Me veprimet e ndërmarra nga gjykata e Kumanovës është parandaluar vjetërsimi i vuajtjes së dënimit.

“Duke qenë se nuk ka kaluar periudhë 10 vjeçare nga veprimi i fundit i ndërmarrë nga gjykata dhe as nuk ka kaluar as dyfishi i kohës së parashikuar me ligj për vjetërsimin e vuajtjes së dënimit, vjetërsimi nuk ka hyrë në fuqi.”- thanë nga Gjykata Themelore – Kumanovë.

Megjithatë pala mbrojtëse ka kërkesë të re. Avokati i Daravellskit kërkon rigjykim, për shkak se klienti i tij është dënuar në mungesë, njoftojnë nga gjykata Penale në Shkup.

“Avokati i tij mbrojtës ka dorëzuar kërkesë për rigjykim për faktin se ai është dënuar në mungesë. Është formuar lëndë e cila i është ndarë këshillit penal për procedim të mëtejmë. Këshilli si fillim do t’i kërkojë të dhënat nga institucioni ku ai po vuan dënimin, ndërsa më pas lënda do të dërgohet për mendim në Prokurorinë Themelore Publike. Pas kompletimit të dokumentacionit, këshilli penal do të sjell vendim.”- Gjykata Penale – Shkup.

Daravellski u arrestua ditë më parë nga policia kufitare në “Tabanoc” dhe momentalisht është në burgun e Idriziovës. Darallevski u dënua për “keqpërdorim të detyrës zyrtare” dhe me veprimet e tij ka dëmtuar buxhetin e shtetit për 2.5 milionë euro në periudhën 1999-2002.