Shefi i diplomacisë Timço Mucunski nuk pret asnjë problem në eurointegrime pas vërejtjeve të vendeve të Unionit dhe Brukselit për votimin e përmbajtur të Maqedonisë në Kombet e Bashkuara për rezolutën për Ukrainën. Pasi ambasadori polak Mariush Brimora, vendi i të cilit është kryesues me Unionin, tha se veprat janë më të zëshme se fjalët, Mucunski iu përgjigj se Maqedonia gjithmonë e ka përkrahur Ukrainën edhe në aspektin ushtarak edhe në atë politik. Sipas Mucunskit, është legjitime që partnerët ndonjëherë të mos pajtohen.
“Fakti që nuk u pajtuam për një votim në Kombet e Bashkuara nuk do të thotë se do të prishen relacionet tona dypalëshe me pjesë të këtyre vendeve anëtare të BE-së, dhe nuk do të ketë asnjë ndikim në relacionet tona me BE-në”, tha Timço Mucunski.
Si të ftuar në Daily Click analistët Nilkolla Sërbov dhe Emir Hasanoviq debatuan nëse Maqedonia ka zgjedhur anë në relacionet e reja mes Brukselit dhe Uashingtonit, pas bashkësponzorizimit tonë të rezolutës së SHBA-ve. Sipas Sërbovit, pushteti është i afërm me administratën e re të Trampit dhe SHBA-të janë partneri ynë strategjik, kështu që duhej të bënim një hap, ndërsa Hasanoviq thotë se duhej ta përkrahim edhe rezolutën e vendeve europiane dhe të jemi lojtar neutral.
“Jemi në dhomën e pritjes së BE-së tashmë tri dekada dhe nëse ky është mëkati ynë atëherë…ju lutem…kemi ndonjëherë të drejtë – jo me Rusinë, jo me Kinën, jo me Kongon – por me SHBA-të të kemi të njëjtin qëndrim në votimin në KB”, deklaroi Nikolla Sërbov.
“Punë të këtilla, ku do të na vendosin ne si shtet me dy milionë banorë, ne me të vërtetë nuk e kemi luksin të zgjedhim mes tregut të madh të BE-së, ku e kemi diasporën, ku bëjmë tregti, shumë biznese varen nga kjo, ne të vendosemi veten në ngërç”, tha Emir Hasanoviq.
Së fundmi euroambasadori Mihalis Rokas tha se duhet t’i mbajmë vlerat europiane dhe ta vërtetojmë përpjekjen tonë gjeostrategjike në rrugën europiane edhe në proceset e votimit në KB. Ambasadori francez Kristof le Rigoler shkurt theksoi se votimi i Maqedonisë ka qenë i papritur për ta.