Kryetari i Këshillit Evropian, Sharl Mishell paralajmëroi mbrëmë se të gjitha “opsionet mbeten në tryezë” në mbrotjen e interesave të Bashkimit Evropian (BE) nëse Turqia nuk është konstruktive në zgjidhjen e kontestit në pjesën lindore të Detit Mesdhe.
Greqia, anëtare e BE-së dhe Turqia, partner i Greqisë në NATO, aktualisht kanë kontest për caktimin e një zone të kërkimit të gazit në Mesdheun Lindor. Çështja do të diskutohet në samitin e BE-së në Bruksel të enjten dhe të premten.
Në ftesën për samitin, Mishel informoi se darka e liderëve të BE-së të enjten në mbrëmje do t’i kushtohet ekskluzivisht situatës në Mesdheun Lindor dhe marrëdhënieve me Turqinë.
Qëllimi ynë është të krijojmë hapësirë për dialog konstruktiv me Turqinë në mënyrë që të arrihet stabilitet dhe siguri në të gjithë rajonin dhe të garantohet respektimi i plotë i sovranitetit dhe të drejtave sovrane të të gjitha vendeve anëtare të BE-së”, theksoi Mishel në letër.
Kryetari i Këshillit Evropian shtoi se kjo është e mundur vetëm nëse Turqia është konstruktive.
“Të gjitha opsionet mbeten në tryezë për mbrojtje të interesave legjitime të BE-së dhe anëtarëve të saj,” shtoi Mishel.
Përveç Mesdheut Lindor, samiti i BE-së do të përqendrohet në situatën në Bjellorusi, helmimin e liderit rus të opozitës Aleksej Navalni dhe situatën në rajonin e Nagorno-Karabahut, ku po përleshen forcat e sigurisë së Azerbajxhanit dhe Armenisë./MIA