BDI thotë se qytetarët po përballen me rritje të vazhdueshme të çmimeve të produkteve bazë dhe të derivateve të naftës, ndërrkohë që Ministria e Ekonomisë dhe Qeveria nuk kanë ndërmarrë masa konkrete për të lehtësuar presionin mbi buxhetet familjare.
Sipas tyre, nga dita e hënë pritet një rritje e re e çmimeve të derivateve të naftës, e cila pritet të ndikojë drejtpërdrejt në çmimet e transportit, të ushqimit dhe të shërbimeve, duke rritur më tej koston e jetesës për qytetarët dhe bizneset.
Nga BDI vlerësojnë se në një situatë të tillë institucionet duhet të reagojnë me masa konkrete për stabilizimin e tregut dhe mbrojtjen e fuqisë blerëse të qytetarëve.
Si masa të menjëhershme, nga kjo parti propozojnë:
- rritje lineare të pagave prej 3.500 denarë, duke filluar me pagat e muajit mars;
- ngrirje të përkohshme të çmimeve për produktet bazë ushqimore;
- aktivizimin e rezervave shtetërore të naftës, të cilat janë blerë me çmim më të ulët se 70 denarë për litër;
- vauçer prej 3.000 denarësh për punonjësit që punojnë jashtë vendbanimit të tyre, për të kompensuar rritjen e kostos së transportit.
Nga BDI theksojnë se këto masa mund të ndërmerren menjëherë nëse ekziston vullnet institucional dhe se qytetarët kanë nevojë për reagim të shpejtë përballë rritjes së çmimeve.