“Arbeni nuk do shkarkohej nëse do ta kishte mbiemrin Spasovski!”. Me këto fjalë edhe sot Bashkimi Demokratik për Integrim ka vazhduar me reagime për shkarkimin e Drejtorit të Qendrës për Shëndet Publik në Shkup, Arben Zyberit, nga ana e Ministrit të Shëndetësisë Venko Filipçe.
Integristët shkarkimin e kuadrit të tyre e quajnë “veprim të turpshëm të hakmarrjes politike dhe urrejtjes latente ndaj shqiptarëve”. Shkruajnë se Zyberi i ka shërbyer vendit dhe qytetarëve me besnikëri e përkushtim dhe se ka luajtur një rol të madh në menaxhimin e krizës së koronës.
“Arsyeja e shkarkimit të tij është më se e qartë, pasi ajo ndodhi menjëherë pasi xhaxhai i Arben Ziberit pranoi të ishte kandidati për Kryeministër. Prekja e familjes së kandidatit të parë shqiptar për Kryeministër është një turp dhe një veprim i papranueshëm. Gjithashtu tregon mendësinë e partive maqedonase, që sipas tyre pushteti u takon vetëm maqedonasve dhe shqiptarët nuk kanë të drejtë ta kërkojnë Kryeministrin” shkruajnë nga BDI.
Nga kjo parti po ashtu vlerësojnë se shkarkimi është një veprim i qartë kundër lirisë së fjalës dhe një akt diskriminimi, pasi siç shtojnë, deri më tani asnjë nuk është pushuar nga qeveria për shprehjen e mendimit të tij në Facebook.
“Pa gjykuar aspak mbi përmbajtjen e postimit të Zyberit, të gjithë e dinë se nëse kjo do të ishte arsyeja e vërtetë, gjysma e ministrave të LSDM-së, përfshirë ish-kryeministrin Zaev, do të duhej të ishin pushuar nga puna disa herë. “Një shoqëri” nuk është më shumë se një parullë marketingu për LSDM-në. Pas fasadës, LSDM ende nuk është më mirë se paraardhësit e tyre duke mos i pranuar ende parimet themelore demokratike si liria e fjalës, barazia dhe e drejta e etnive jo-shumicë për të emëruar kandidatin e tyre për Kryeministër” thonë nga BDI./TV21