Deri sa Ministri i Ekonomisë, Kreshnik Bekteshi mbrëmë në ClickPlus po thoshte se sundimi i ligjit është parakusht për zhvillimin ekonomik dhe për këtë institucionet duhet të nisin zbatimin e programit me të cilin Qeveria e ka fituar besimin, ndërhyri deputeti i opozitës shqiptare Elmi Aziri, duke i thënë se mandati është marrë, e nuk është fituar!
Elmi Aziri: “Nuk e keni fituar mandatin, e keni marrë…
Kreshnik Bekteshi: Çfarë kemi bërë?
Elmi Aziri: E keni marrë mandatin, nuk e keni fituar…
Kreshnik Bekteshi: “E kemi marrë?! Tash do të vijnë zgjedhjet gjatë këtij viti…”.
Elmi Aziri: Krejt treguesit thonë se është sistem hibrid, është sistem i kapur…”.
Kreshnik Bekteshi: Përsëri do të ketë zgjedhje këtë vit dhe do të shohim edhe një herë…”.
Kështu nga ekonomia, debati kaloi në politikë. Ndonëse zgjedhjet lokale duhet të mbahen në vjeshtë, që tani partitë kanë filluar një lloj parafushate për zgjedhjet. Bekteshi i tha Azirit se BDI do ta lëshojë ASH-në të fitojë në Strugën nëse për kryetar garon Ziadin Sela.
Kreshnik Bekteshi: “Ndoshta ua lëshojmë Strugën me të vetmin qëllim nëse kandidon lideri juaj për shkak se thonë e treta e vërteta dhe ndoshta këtë herë ka fat dhe fiton”.
Elmi Aziri: “Po e banalizon debatin bre Kreshnik…”.
Kreshnik Bekteshi: “E po tani, e more, e vodhe, e bëre…”.
Elmi Aziri: “Po e banalizon debatin…”.
Kreshnik Bekteshi: A ke fituar në Kumanovë? Atje s’ka pasur vjedhje të votave ë?!
Elmi Aziri: “Një gjë po ta them! Që të shërbejë për herave të tjera…”.
Kreshnik Bekteshi: “Po do ua lëshojmë ne nuk është problem… jemi të gatshëm edhe të bashkëpunojmë…”.
Elmi Aziri: “Nuk ke nevojë të lëshosh asgjë…”.
Fatmir Aliu: “Hajde përhajr, çfarë bashkëpunimi…”.
Kreshnik Bekteshi: “Po meqenëse në vazhdimësi jemi duke i fituar këta…”.
Elmi Aziri: “Ziadin Sela është lider i së ardhmes së shqiptarëve. Ziadin Selës as nuk mund t’i lëshosh asgjë, as t’i marrësh asgjë…”.
Se kush fiton e kush jo, Bekteshi tha se është dëshmuar në zgjedhjet e fundit lokale, e për këtë Aziri i tha se e gjitha është bërë me manipulime. Ministri nga radhët e BDI-së hodhi dyshime se që tani po vërehet se ka një far koalicioni mes Aleancës për Shqiptarët dhe opozitares maqedonase VMRO-DPMNE, për të cilën deputeti i ASh-të i tha se VMRO-ja BDI-së i është bërë obsesion dhe se mund të ketë koalicion edhe ASh-VMRO, por koalicion me parime, e jo siç bënte njëherë e një kohë BDI-ja kur bashkëqeveriste me DPMNE-në.