BDI apo ASh do të veprojë e para? Janë PRO heqjes së “20%-shit”, por nuk ndërmarrin asgjë për ta realizuar

TË FUNDIT

Cila nga partitë shqiptare do të jetë më e zonja për të iniciuar ndryshimet kushtetuese për heqjen e 20% nga Kushtetua?

Elmi Aziri nga Aleanca për Shqiptarët pohon se do të jenë vigjilent mbi situatën politike dhe në momentin e duhur do të ndërmarrin veprimin e duhur mbi këtë çështje.

“Në momentin që ne kemi sinjale dhe vlerësojmë se kemi gatishmëri edhe nga subjektet tjera jo vetëm në formë deklarative për të bërë një gjë të tillë sigurisht se ne do të ndërmarrim hapa. Besoj se do të duhet të trajtohet çështja me seriozitet maksimal për shkak se ka të bëj me një ofendim të paparë të një kategorie shumë të madhe të qytetarëve siç janë shqiptarët e Maqedonisë se Veriut dhe ne nuk duhet të jemi objekt dhe nuk duhet t të futemi në vallen e kujtdo tjetër”.

Heqja e 20% si term për shqiptarët është çështje e madhe dhe mund të realizohet vetëm nga parti të mëdha dhe serioze, tha për TV21 koordinatori i grupit parlamentar të BDI-së, Arbër Ademi.

“Opozita po kërkon tema për ekzistencën e vet politike dhe po krijon përshtypje false dhe të gabuar në opinion gjoja se mund të përballen me çështje të mëdha, por edhe ata janë të vetëdijshëm se kjo çështje dhe çështjet tjera të mëdha janë kafshata që nuk mund t’i kapërdijnë dot, për arsye se nuk kanë kapacitet për të realizuar politika të rëndësishme dhe të mëdha”.

Megjithatë as BDI si partia më e madhe shqiptare nuk ka plan konkret se kur do të ndërmerr nismë për ndryshime kushtetuese.

“Jemi të bindur edhe sot se në momentin e parë që do të hapet Kushtetuta e vendit sa i përket avancimeve të të drejtave të komuniteteve në vend përfshirë këtu në radhë të parë shqiptarët një gjë e tillë edhe do të arrihet”, thotë Arbër Ademi.

Ditë më parë nga Lëvizja Besa për TV21 thanë se si parti në fillim do të thërrasin takim mes partive politike shqiptare për të unifikuar qëndrimin rreth çështjeve të cilat janë prioritet i përbashkët i shqiptarëve pastaj do të jetë me e lehtë për të negociuar me partitë maqedonase, ndërsa sipas Alternativës nuk është e rëndësishme se kush inicion takimin, megjithatë thonë se si parti që nga themelimi kanë qenë të qëndrimit se shqiptarët nuk duhet të trajtohen me përqindje.

MARKETING I PAGUAR POLITIK