Bakllava për nevojtarët dhe ekipet kujdestare! Tetovë, bamirësit ushqejnë nevojtarët dhe jetimët për Bajram

Rreth 2500 ballkava janë shpërndarë për nevojtarët dhe shërbimet e kujdestarisë siç janë zjarrfikësit, mjekët, policët dhe punëtorët e Ndërmarrjes Publike për pastrimin e qytetit. Ky aksion është organizuar  nga shoqata humanitare “Agimi i Bamirësisë” që është financuar nga një donator anonim. Visar Xhaferi nga kjo shoqatë thotë se kjo  iniciativë është organizuar me qëllim që sofra e çdo besimtari të jetë e begatshme.

“Ajo që është e bukura për këtë Bajram është se kemi një donator që ka dhënë mbi 2500 bakllava  dhe ai ka dashur të mbetet anonim. Një pjesë  të tyre e kemi shpërndarë me pakot e fundit të ndihmës për ramazan  dhe agjëruesve që u kemi dhënë iftare dhe një pjesë e kemi vendosur t’i vizitojmë shërbimet  24orëshe që punojnë në rrethinën e Tetovës”, tha Visar Xhaferi, Agimi i Bamirësisë.

Para festës së Fitër Bajramit nga kjo shoqatë janë shpërndarë edhe pako ushqimore si dhe mbi 5200 iftare që janë dërguar në shtëpitë e besimtarëve gjatë 30 ditëve të muajit të ramazanit.  Festa e Bajramit   në Tetovë ka aktivizuar  edhe shumë humanitarë dhe vullnetarë duke ndarë pako ushqimore si dhe rroba për jetimët dhe familjet nevojtare.