Askush nuk tregon “çfarë e mire po vjen”, integristët “enigmën” do ta zbulojnë të shtunën

Kanë javë që në rrjete sociale, publikojnë fushën e gjelbër me shenja të pikësimit. Tash kanë nisur me shprehjen “Diçka e mirë po vjen”, por askush nga Bashkimi Demokratik për Integrim nuk tregon se ç’është kjo e mirë. Madje as kryetari i integristëve Ahmeti nuk tregon, por paralajmëroi se do të jetë diçka e ngjashme me idenë për “kryeministër shqiptar”.

“Më 5 qershor përsëri familja jonë do ta dalë me një platformë që fillimisht ashtu diskutabile dhe me debat shumë të madh që ishte, “Kryeministrin i parë shqiptar”, edhe kjo platformë do të ketë debat shumë të madh, por do e lej 5 qershorin”, deklaroi Ahmeti.

Por nëse kreu i LSDM-së Zoran Zaev para një viti e pat kundërshtuar idenë për “kryeministrin shqiptar”, tani duket më i relaksuar me hapin e ardhshëm të Ahmetit. Nuk tregon se çfarë, por kryeministri thotë se do të jetë një gjë e bukur dhe e duhura për shekullin 21.

“Unë do ta them atë që e di sepse kuptohet jam i informuar nga zëvendësi im në Qeveri, BDI ka një punë të mirë për ta kumtuar të shtunën. Është e bukur sepse është në korrelacion me punën e Qeverisë, është e bukur sepse është moderne dhe sepse është adekuate për shekullin 21. Mua më pëlqen që kështu mendohet në nivelet më të lartë të BDI-së. Unë do ta lë që BDI vetë ta kumtoje sepse kjo është agjenda e tyre. Besoj se kjo është në frymën e përparimit të ambientit politik në shtet”, tha Zaevi.

Jo zyrtarisht pritet që fraza “Diçka e mirë po vjen” të ketë lidhje me zgjedhjet lokale, por megjithatë, kjo mbetet për t’u parë të shtunën.