ASH kërkon zhbllokimin e ligjit! Zaev: Shqyrtojmë mundësinë t’a dorëzojmë me flamur evropian

Në Agjendën e Kuvendit as për këtë javë nuk është caktuar vazhdimi i Komisionit për Mbrojtje dhe Siguri në të cilin duhet të debatohet mbi amendamentet për Ligjin për shtetësi. Kryetari i Komisionit Mile Talevski thotë se po pret që partitë politike të merren vesh e pas kësaj të thërrasë komisionin.

 “Po pres që të arrihet marrëveshje mes koordinatorëve të grupeve parlamentare të partive politike dhe pastaj do të thërras Komisionin”, u shpreh Mile Talevski – kryetar i Komisionit.

Nga Aleanca për Shqiptarët kanë ftuar partitë politike në Kuvend, që të heqin dorë nga bllokada ndaj Ligjit për shtetësi, dhe të kalojnë të njëjtin në Komision, që të hapet rruga për miratim të të njëjtit në seancë plenare.

 “Ne jemi në bisedime me kryetarin e Komisionit dhe presim dita ditës të thirret komisioni. Por gjithashtu kemi thënë se jemi serioz në këtë çështje dhe nuk do të heqim dorë nga ky ligj. Mundësia që ligji të shqyrtohet me flamur evropian për ne nuk është e papranueshme, por vazhdojmë të insistojmë që ligji të shqyrtohet në Komision dhe apelojmë të gjitha subjektet politike në Kuvend që të kenë mirëkuptim, të jenë tolerant dhe këtë ligj ta kalojmë ashtu siç jemi marrë vesh”, deklaroi Syrja Rashidi – deputet i ASH-së.

Por VMRO-DPMNE ligjin nuk e sheh si zgjidhje të mirë ligjore.

 “Me amendamentet e tilla të dorëzuara  nga këta që janë marrë vesh, si rezultat i kësaj do të sillet ligj antikushtetues dhe të cilin gjithkush mund ta kushtëzojë një ditë  para gjykatës Kushtetuese. Kjo zgjidhje e tillë serioze, vlerësojmë se duhet të sillet me debat të zgjeruar të të gjithë ekspertëve”, potencoi Bojan Stojanovski – deputet i VMRO-DMNE-së.

Kryeminsitri Zaev shprehet i habitur se përse ligji po bllokohet, ndërsa për momentin tha se po analizohet mundësia që të tërhiqet ligji  dhe të lëshohet me flamur evropian.

 “Kjo për momentin konsultohet me shërbimet profesionale, juridike- ligjvënëse, me sektorin për çështje evropiane, që të shohim se a ka aty, dispozita të qarta, sakta apo rregullore që imponohet apo zbatohen me këtë zgjidhe ligjore”, theksoi kryeministri Zoran Zaev.

Lideri i “Së Majtës” Dimitar Apasiev kalimin e ligjit me flamur evropian e sheh si kundërligjore dhe nëse pranon një gjë të tillë kryeparlamentari Talat Xhaferi, atëherë do të kryej vepër penale.