ASH-AAA pret takim, Zaev thotë javën e ardhshme! “Shtyhet për arsye shëndetësore të dikujt që duhet të jetë në takim”

TË FUNDIT

Këtë javë nuk do të mbahet takimi mes pushtetit dhe opozitës shqiptare për ligjin për shtetësinë, zgjidhja e të cilit do të zhbllokonte Kuvendin nga mijëra amendamentet e koalicionit Aleanca-Alternativa. Ndonëse vetë e kishte paralajmëruar për këtë javë, Kryeministri Zoran Zaev shpjegon për TV21 se shtyrja bëhet për arsye shëndetësore, pa specifikuar se të kujt, ndërsa shton se  takimi do të mbahet javën e ardhshme dhe është optimist për zgjidhje.

 “Ka arsye shëndetësore të njerëzve që duhet të jenë të pranishëm në takim. Andaj në vend të ditës së nesërme ose së premtes, do të jetë në fillim të javës së ardhme, me shumë gjasa të hënën. Kemi tashmë propozimet tona dhe mendojmë, të paktën nga ana jonë, se do të gjendet zgjidhje në drejtim të qëllimit që dëshiron të arrijë Aleanca-Alternativa për marrjen e shtetësisë nga qytetarët”, tha për TV21, kryeministri Zoran Zaev.

Para se TV21 ta marrë këtë përgjigje nga Kryeministri, deputeti i koalicionit opozitar Aleanca-Alternativa, Elmi Aziri u tha gazetarëve se pret që takimi të bëhet këtë javë, ndonëse kohë e saktë nuk ishte caktuar.

 “Jemi në pritje faktikisht edhe të takimit që do të ndodhë këtë javën që t’i shohim pozicionet e reja, argumentet e reja të tyre, ndërsa ne edhe atë ditë, dhe çdo ditë kur do të ndodhë takimi ne jemi të argumentuar me të gjitha propozimet që i kemi në propozim ligjin për ndryshim, pra ne jemi të gatshëm për debat dhe jemi të gatshëm t’i dëgjojmë argumentet”, u shpreh Elmi Aziri – ASH-AAA.

Deri sa nuk ka zgjidhje për shtetësinë, Aziri thotë se opozita shqiptare do të vazhdojë me bllokim të punës së Kuvendit me amendamente. Po deputeti i BDI-së, Arbër Ademi, thotë se opozita shqiptare nuk po bllokon çdo ligj siç është zotuar, sepse sipas tij, bllokime nuk bëhen kur në pyetje janë interesat e ngushta partiake.

 “Për shembull sjelljen e Kodit zgjedhor  nuk e kanë bllokuar. Përkundrazi, edhe ata kanë qenë propozues. Kjo flet shumë, kur bëhet fjalë për interesa të ngushta partiake, ata nuk bllokojnë, e kur bëhet fjalë për mijëra e mijëra qytetarë, që presin mbështetje financiare nga shteti, në këtë krizë shëndetësore, socio-ekonomike, të paparë deri më tani, ata bllokojnë”, potencoi Arbër Ademi nga BDI. 

Ademi u shpreh se vetëm 2674 persona janë paraqitur për marrje të shtetësisë, ndërsa deputeti opozitar Aziri nuk përmend numër, duke thënë se në to ka qasje pushteti.

Të pyetura nga TV21 se a janë përgatitur me të dhëna për takimin e radhës pushtet-opozitës, siç ishte lënë herën e fundit, nga Ministria e Brendshme përgjigjen se “disponojnë me të gjitha të dhënat në lidhje me procedurat për shtetësi dhe këto të dhëna do të jenë në funksion të një zgjidhjeje të suksesshme të çështjes”.

TË NGJAJSHME