ASH-AAA kundër shtyrjes së regjistrimit! Sela: Regjistrimi do të duhet të përfundojë më 21 prill

Në asnjë mënyrë nuk guxon të prolongohet regjistrimi i popullsisë. Ky është qëndrimi i përbashkët i dy liderëve të dy partive opozitare Aleanca për Shqiptarët dhe Alternativa. Justifikimi se për shkak të rritjes se numrit të të infektuarve me Covid-19, duhet të anulohet regjistrimi i popullatës për koalicionin nuk mbanë.

Formati i takimit të djeshëm Zaev- Mickoski për Gashin është i papranueshëm.

 “Takohen dy veta dhe marrin një vendim për të provuar ta shtyjë regjistrimin. Po them për të provuar për shkak se në jemi këtu të mos e lejojmë një gjë të atillë. Ne do të bëjmë çmos, do të përdorim gjitha mekanizmat tonë demokratik, fuqinë tonë politike që regjistrimin të mos e ndalim dhe ky proces të vazhdojë”, tha Afrim Gashi – Kryetar i Alternativës.

Për Selën, takimi i djeshëm dhe marrëveshjet e djeshme janë të barasvlershëm me zero. Ai theksoi se vendi ku vendoset për shtyrje, ose ndërprerje të regjistrimit është vetëm Kuvendi, ndërsa në Kuvend, koalicioni do të shfrytëzojë mekanizmat për bllokimin e ligjit.

 “Zëshëm, qartë, shkurt dhe shqip, koalicioni ASH dhe AAA do të shfrytëzojë këtë mekanizëm të Badenterit në mënyrë që regjistrimi mos të shtyhet dhe të mbahet në afatet e caktuara. 13.13 Ne do ta bllokojmë shtyrjen e ligjit këtu në Parlament për regjistrim, dhe regjistrimi do të duhet të përfundojë më 21 prill”, theksoi kryetari i Aleancës për Shqiptarët, Ziadin Sela.

Sela bëri thirrje edhe partive tjera shqiptare që të përdorin këtë mekanizëm që të mos ketë shtyrje të regjistrimit.

Ndryshe përmes një amendamenti të nënshkruar nga deputeti Halil Snopçe, vitin e kaluar u kërkua që regjistrimi të shtyhet.

 Ndërkohë sipas marrëveshjes se djeshme për shtyrjen e regjistrimit, shtyrja nuk vlen për mërgatën e cila do të mund të vazhdojë të regjistrohet deri në shtator kur edhe parashihet që të rifilloj regjistrimi i popullsisë.