Arsovska pranon të pijë kafe me ish-kryetarët! Penovi dhe Kostovski pranuan, Trajanovski dhe Shilegovi jo

TË FUNDIT

TV21 propozoi, kurse kryetarja e Shkupit Danella Arsovska pranoi nisëm për të organizuar një takim për kafe me ish-kryetarët e Qytetit të Shkupit me qëllim që të shkëmbejnë ide dhe qëndrime për zhvillimin e qytetit.

“Qyteti i Shkupit aq sa është qyteti im, qyteti i shkupjanëve, aq është edhe qyteti i të gjithë kryetarëve të mëparshëm. Secili prej tyre ka lënë ndonjë gjurmë në atë që ka bërë dhe që ka dhënë për shkupjanët, në atë që ka investuar për shkupjanët, si projekte që janë realizuar. Jam e bindur se ata mund të kontribuojnë me ndonjë këshillë nga koha e mandatit të tyre”, theksoi Danella Arsovska, kryetare e Qytetit të Shkupit.

Nisma e këtillë hasi në përgjigje pozitive nga ish kryetarët e Shkupit, Risto Penovi dhe Trifun Kostovski. Penovi në bisedë telefonike për TV21 konfirmoi se do të shkonte në një takim të tillë, ndërsa Kostovski takimin e vlerësoi si “akt pozitiv”.

“Absolutisht do të ndihem mirë që të mblidhemi të gjithë ish-kryetarët e Shkupit që të bisedojmë për punët devijuese në vetëqeverisjen lokale sidomos në Qytetin e Shkupit, për të cilën unë do të them se edhe sot e kësaj dite decentralizimi ka ngecur në Republikën e Maqedonisë, se vetëqeverisja lokale ka më shumë kompetenca se sa mund të ketë të ardhura, veçanërisht tani me krizën energjetike, ndërsa Qyteti i Shkupit është histori e veçantë”, pohoi Trifun Kostovski, ish-kryetar i Shkupit.

TV21 i kontaktoi edhe ish kryetarët Koce Trajanovski dhe Petre Shilegov. Trajanovski nuk deshi të fliste ndërsa Shilegov as konfirmoi e as refuzoi se do të merrte pjesë në një takim për kafe që do ta organizonte kryetarja Arsovska.

error: Content is protected !!