Arrihet marrëveshje Mickoski-Filipçe! Bashkë do të punojnë për ligjet e gjyqësorit, energjetikës, shëndetësisë

Kryeministri Hristijan Mickoski dhe kryetari i LSDM-së, Venko Filipçe, u pajtuan për grupe pune për miratimin më të shpejtë të ligjeve për gjyqësorin nga Agjenda e reformave, për energjetikë dhe për projekte në shëndetësi. Takimin e tyre të parë Filipçe e vlerësoi të mirë dhe konstruktiv dhe pret që në grupe t’i bashkohen edhe partitë tjera.

“Të gjitha partitë politike do të ulen në tryezë. Kjo është thjesht për të mirën e vendit, ne nuk kemi as kapacitet të mjaftueshëm njerëzor nëse shikon të izoluar çdo parti politike, shohim gjithnjë e më shumë të rinj që largohen nga vendi, duhet të dërgojmë një mesazh bashkimi për të mirën e vendit”, tha Venko Filipçe.

Të dytë kanë biseduar edhe për eurointegrimin dhe ndryshimet kushtetuese.

“Fatkeqësisht kemi pozicione të ndryshme. I kuptoj pozicionet e kryeministrit, mbetet për këtë të flasim në mënyrë shtesë”, tha Filipçe.

Derisa ishin të ulur në të njëjtën tryezë Mickoski në Facebook shkroi se Maqedonisë i nevojiten përgjegjësi dhe mençuri. Nga qeveria njoftuan se kryeministri në takimin ka theksuar se sistemit i duhet reforma të thella.

“Është e nevojshme të mobilizohen të gjithë individët dhe strukturat përparimtare që mund të kontribuojnë në rrugën e zhvillimit të vendit. Interesat shtetërore maqedonase duhet të jenë pikënisja në diskutimet për çdo çështje, ku Mickoski i kërkon Filipçes që të përpiqet të jetë faktor konstruktiv në përkushtimin për ndryshim, reformë dhe përparim”, thotë Qeveria.

BDI, nga ana tjetër, vlerësoi se Mickoski dhe Filipçe po e riformojnë modelin politik – nga një demokraci multietnike në një demokraci monoetnike. Sipas BDI-së, është folur për mbrojtjen e VMRO-DPMNE-së dhe LSDM-së nga përgjegjësia për raste si tragjedia në Koçan, por edhe për largimin e shqiptarëve nga të gjitha nivelet e pushtetit.

“Ky plan nuk është i ri – është përgatitur para tre vitesh me marrëveshjen notore Mickoski Zaev me ndërmjetësim të oligarkëve, kryesisht si çadër mbrojtëse për oligarkinë tranzicionale në vend. Plani tashmë po realizohet, përmes shfuqizimit të Balancerit, vendimmarrjes monoetnike të Gjykatës Kushtetuese, por edhe largimit sistematik të shqiptarëve nga një numër i madh pozicionesh të larta në administratën shtetërore”, deklaroi BDI.

BDI e thirri koalicionin VLEN të tregojë revolt për takimin po prej atje u përgjigjën se BDI ka frikë se pse LSDM ka hequr dorë prej tyre.

“Nuk ka plane publike apo sekrete për të larguar shqiptarët nga askund. Ekziston vetëm frika patologjike e BDI-së nga përgjegjësia para drejtësisë për ish-zyrtarët e tyre, të cilët për dekada u pasuruan mbi shpinën e popullit shqiptar”, deklaori VLEN.

Përndryshe detajet për grupet e punës që i paralajmëruan Mickoski dhe Filipçe ende nuk janë të precizuar.