Tani është zyrtare, Çmimi i Madh i Bahreinit dhe ai i Arabisë Saudite, të parashikuar për t’u zhvilluar në muajin prill, janë hequr nga kalendari i Botërorit të Formula 1 dhe nuk do të zëvendësohen. Vendimi erdhi për shkak të luftës në Iran dhe situatës së tensionuar në Lindjen e Mesme.
Njoftimi u bë publik në orët e para të mëngjesit të së dielës në Shanghai, në prag të Çmimit të Madh të Kinës. Çmimi i Madh i Bahreinit ishte planifikuar për 12 prill, ndërsa ai i Arabisë Saudite për 19 prill.
“Edhe pse ishte një vendim i vështirë për t’u marrë, për fat të keq ky është vendimi i drejtë, duke marrë parasysh situatën aktuale në Lindjen e Mesme,” tha Stefano Domenicali, president dhe Shef Ekzekutiv i Formula 1. “Dua të falënderoj FIA-n dhe promotorët tanë për mbështetjen dhe mirëkuptimin e tyre të plotë, pasi mezi prisnin që të na mirëprisnin me energjinë dhe pasionin e tyre. Ne mezi presim të kthehemi sapo rrethanat të na e lejojnë.”
Për anulimin e garave foli edhe presidenti i FIA, Mohamed Ben Sulayem: “FIA gjithmonë vë në vend të parë sigurinë dhe mirëqenien e komunitetit tonë dhe të kolegëve tanë. Pas një vlerësimi të kujdesshëm, morëm këtë vendim me shumë përgjegjësi. Shpresojmë që paqja dhe stabiliteti të kthehen sa më shpejt në rajon. Mendimet e mia janë me të gjithë ata që janë prekur nga ngjarjet e fundit.”